Lo vicepresident de la Comission Europèa Maroš Šefčovič a cridat lo Reialme Unit a una reünion extraordinària “lo pus lèu possible”. La tòca d’aquela reünion del comitat conjonch per l’aplicacion de l’Acòrdi del Brexit es que los britanics respondan als fòrts chepics que l’Union Europèa sent a prepaus de las intencions del govèrn britanic de complir pas sa part de l’acòrdi sus l’Irlanda del Nòrd. “L’Acòrdi de Retirament es pas dobèrt a la renegociacion e esperam que l’esperit de l’acòrdi se respècte entièrament”, çò avertiguèt Šefčovič qualques minutas après la presentacion del controversiat projècte de lei del govèrn britanic que modifica lo protocòl per l’Irlanda del Nòrd exprimit dins l’acòrdi pel Brexit.
 
Šefčovič parlèt dimars de ser amb son omològ britanic Michael Gove, e li diguèt net e clar que l’Union Europèa se podiá pas renegociar.
 
Après la presentacion de la polemica revision de l’acòrdi, la presidenta de la Comission Europèa, Ursula von der Leyen, avisèt Londres que los paches se devon complir, e qu’o far pas “viòla la lei internacionala e afeblís la fiança”. Lo president del Conselh Europèu, Charles Michel, jonguèt las paraulas de von der Leyen en ramentant que l’acòrdi se signèt “de part dels dos costats” e “deu èsser aplicat entièrament”. “De violar la lei internacionala es pas acceptable e genèra pas la fisança que nos cal per bastir la relacion futura”, çò soslinhèt.
 
De son latz, lo president del Parlament Europèu, David Sassoli, avertiguèt dimars passat que tot ensag d’afeblir l’Acòrdi de Retirada auriá “de consequéncias grèvas”.
 
La presentacion de la lei del govèrn britanic per alterar qualques disposicions de l’acòrdi pel Brexit coincidís amb l’ochen cicle de negociacions entre l’Union Europèa e lo Reialme Unit que se fa a Londres. La velha de la presentacion de la lei, lo ministre britanic per l’Irlanda del Nòrd, Brandon Lewis, admetèt que los plans del govèrn britanic mancavan “al drech internacional”.
 
“Diriá que òc, qu’aquò viòla lo drech internacional d’una manièra fòrça especifica e limitada”, çò afirmèt Lewis al parlament quand èra interrogat suls plans de l’executiu britanic.