Lo magazine de cultura en occitan, Lo Diari, fa ara una ofèrta fòrça interessanta. Abans lo 16 de setembre (dimècres venent), qui s’abona beneficiarà d’un an d’abonament a 7 numèros mas al prètz de 5. A mai, se recebrà tanben lo numèro especial de l’estiu consagrat a l’America del Sud, de marcapaginas, de cartas postalas, de pegasolets... Per beneficiar d’aquela ofèrta se cal abonar sus aqueste sit web.
 
Lo Diari es un magazine cultural bimesadièr de granda qualitat grafica e jornalistica editat per l’Institut d’Estudis Occitans de la region qu’a pres lo nom d’Occitània. I trobaretz d’informacions, d’articles, d’entrevistas, de cronicas, de criticas, e tot en occitan se vos plai.
 
Sa version en linha (lodiari.com) prepausa de contengut aumentat. Aquí es possible d’i legir lo darrièr numèro de la revista, d’agachar de clips musicals, de vos téner al fil de l’actualitat culturala, d’apondre vòstres eveniments e de comunicar amb la redaccion.
 
Lo mèdia cèrca d’integrar totes los qu’aiman e fan viure la lenga e la cultura occitanas en tota Occitània, de Bordèu a Niça e d’Aran a Vichèi, e cèrca doncas totjorn de collaboradors e d’idèas novèlas.
 
La còla de Jornalet e del Diari son a entamenar un acòrdi de cooperacion.