Los Dragons Catalans tornavan trapar Brutus davant los 5000 espectators autorizats amb la recepcion del campion Wigan. Mas aprèp un temps de confinhament pels jogaires e solament doas sesilhas d’entraïnament collectiu, los Sang e Aur manquèron de ritme e d’automatismes. Dominèron bravament, mas se faguèron contrar tròp aisidament. Superats, se trapèron menats 28-0. Los dos ensages de Bosquet e Yahe dins las darrièras minutas tornèron metre la marca a de proporcions mai justas (28-12) e faguèron prene consciéncia als catalans de çò que los espèra. D’en primièr, lo quart de finala de la Cup contra Salford d’anar jogar e ganhar divendres en Anglatèrra e que se poirà seguir en dirècte sus la cadena L’Équipe.

Per un punt
 
Las autras 4 partidas d’aquesta dotzena jornada de la Superliga s’acabèron sus de marcas plan mai estreitas.
 
Dijòus, Hull FC ganhava de 3 punts (26-23) contra Wakefield. Avantatge de dos punts pels Lops de Warrington (12-10) fàcia als Tigres de Castleford .
 
Divendres, la victòria se joguèt al punt en aur sus un tombat del pianenc Fages per balhar la victòria a St Helens (21-20) fàcia a Hull KR. Luke Gale passa dins la darrièra minuta lo tombat que permet a Leeds de batre Huddersfield (13-12).
 
 
Al percentatge
 
Fàcia a l’impossibilitat de clavar lo calendièr, amb de jornadas de ratrapatge programadas los jorns de Cup e amb lo coronavirus que pòt empachar de formacions de jogar, la Superliga s’es avisada quinas equipas poirán pas disputar las 20 partidas de la sason regulara. An decidit d’abandonar lo sistèma costumièr del classament per passar al percentatge de victòrias a respècte de las partidas jogadas. Seràn classadas las formacions qu’an disputat almens 15 partidas. Atal, los Dragons se trapavan en cap del classament abans la dimenjada e cinquens aprèp la desfaita de dimenge. Se partisson la primièra plaça St Helens, Warrington e Wigan amb un percentatge d’un 72,73 % de victòrias.
 
Una novèla règla es tanben ajustada per rason sanitària: interdiccion de celebrar collectivament un ensag jos pena d’una emenda de 250 liuras e d’una possibla suspension!
 
 
NRL: las Pantèras e los Polets en forma
 
La jornada d’NRL foguèt marcada per l’afrontament entre los primièrs, las Pantèras de Penrith, e los tresens, las Anguialas de Parramatta. La partida foguèt plan disputada. Amb un ensag marcat a 4 segondas de la pausa e un autre a 20 segondas de la fin, la marca 20-2 en favor de Penrith rend pas compte de l’intensitat del combat.
 
Los Polets de Sydney fan una demostracion de jòc ofensiu que daissa Newcastle suls genolhs: 42-12.
 
Los Combatents neozelandeses jògan d’a fons la possibilitat de gardar un pichon espèr de qualificacion, mas prenon dos ensages de las Làmias de Cronulla dins las darrièras 5 minutas: 14-22.
 
A doas jornadas de la fin de la fasa de classament, las 8 formacions qualificadas per las pelhòfas son conegudas: Penrith, Melbourne, Polets, Parramatta, Canberra, Lapinons, Newcastle e Cronulla.
 
 
UnCentre Nacional pel XIII
 
La mesa en plaça d’un Centre Nacional de Formacion, esplech pels recampaments de l’esquipa de França e per la formacion dels joves, èra la question centrala del Congrès de la Federacion que se teniá al Barcarés dissabte. Lo projècte portat pel president Marc Palanques recebèt l’assentiment dels dos tèrces dels votants. L’estructura se traparà a Alzona, pròche de Carcassona.
 
Lo president anoncièt que se portariá pas candidat per un segond mandat e sollicitèt la secretària generala, Fabiana Albèrt, per ocupar lo cadieral presidencial dins d’eleccions ont se prepara de listas concurrentas, marca de las divisions gaire portairas d’una dinamica collectiva necessària al movement tretzista.
 
 
Sul Net
 
Presentacion del Tolosa Olimpic de gaitar:
 

 
 
 
 
 
Alan Roch