E mai s’es fòra Occitània, Barcelona es una vila que prepausa totjorn de corses d’occitan. Puèi que l’occitan es lenga oficiala  de Catalonha, los barceloneses i pòdon aprene la lenga nòstra tant als corses qu’ i organiza lo Conselh General d’Aran coma al CAÒC durant tota l’annada. Ongan, los corses que prepausa lo CAÒC se faràn majoritàriament per videoconferéncia, e son doncas dobèrts tanben al mond qu’abitan luènh de la capitala catalana.

La rintrada pels corses d’occitan al CAÒC arriba amb una novetat: los corses de totes los nivèls (de l’A1 fins al C1) se tendràn en linha per mejan de l’aplicacion Classroom. Atal, los ensenhaments son totjorn guidats per de professors expèrts mas son accessibles tanben al mond que vivon luènh de Barcelona.
 
Ça que la, lo cors de mantenenement e de convèrsa en occitan contunha d’èsser presencial.
 
Lo periòde d’inscripcion s’acaba lo 30 de setembre e los ensenhaments començan en octòbre.
 
Los corses d’occitan del CAÒC se tenon dempuèi l’an 2008, son reconeguts coma una activitat de formacion permanenta del professorat pel departament d’ensenhament de la Generalitat de Catalonha e son adaptats als postulats del quadre referencial europèu.
 

 

---

Mai d’informacion e inscripcions sul sit del CAÒC.