Los jornalistas e los observaires poiràn desenant èsser arrestats en cobrissent de manifestacions dins l’estat francés, segon lo nòu “esquèma estatal de manten de l’òrdre” (SNMO segon sa sigla en francés). Aquel nòu SNMO, que lo ministèri de l’interior francés publiquèt dijòus passat, soslinha que los òrdres de dispersion de manifestacions devon pas conéisser cap d’excepcion, al risc d’empedir la premsa e las ONG de testimoniar d’eventualas violéncias, çò rapòrta Libération.
 
Paradoxalament, las primièras linhas d’aquel esquèma fan una defensa de “l’exercici de la libertat d’expression e de comunicacion” coma “una condicion primièra de la democracia e una de las garentidas del respècte dels autres dreches e libertats. L’Estat a la responsabilitat de garentir aquel exercici”. Pasmens, impausa una doctrina dura e valida l’usatge d’armas talas coma las dichas balas de defensa e las granadas coma las que tuèron Rémi Fraisse. A mai, remembra que los jornalistas e los observaires de diferentas ONG poiràn èsser interpelats e perseguits.
 
Aquel SNMO a provocat l’indignacion del sindicat francés dels jornalistas (SNJ), de las ONG e d’Amnestia Internacionala.
 
De remarcar qu’aquelas mesuras son anonciadas dins lo periòde de contèsta sociala lo mai durament reprimit de l’istòria recenta de l’estat francés, amb un inquietant nombre recòrd de manifestants nafrats per la polícia, e del temps que las violéncias policièras son cada còp mai denonciadas pels jornalistas e las organizacions umanitàrias.