Divendres passat, Itàlia autorizèt que lo vaissèl Open Arms, que transportava 150 migrants salvats de la mar, desembarquèsse al pòrt de Palèrme, en Sicília. La decision arribèt après dètz jorns d’una espèra insuportabla. Lo quite divendres de matin, una cinquantena de migrants avián sautat dins la mar per ensajar de nadar fins a la còsta de Palèrme.
 
L’organizacion umanitària Proactiva Open Arms aviá inicialament salvat 278 migrants, dont 50 menors non acompanhats, après far tres operacions de socors en mar Mediterranèa entre l’8 e l’11 de setembre passats. Malta refusèt de los desembarcar e la situacion sul naviri veniá de mai en mai insuportabla. Dins los darrièrs jorns, aperaquí 125 personas sautèron dins la mar en ensajar d’aténher la còsta en nadant. La Gàrdia Costièra italiana los salvèt.
 
Lo fondador de l’organizacion umanitària catalana, Òscar Camps, aviá explicat que mai d’una persona socorreguda devián desembarcar lèu e recebre d’assisténcia medicala car avián patidas de cremaduras e d’autras nafraduras a causa de torturas e de violaments.