La justícia de Turquia a dobèrt una procedura penala contra lo Collègi d’Avocats d’Istambol per aver penjat una bandeiròla de sosten e remembre de l’avocata e presonièra politica curda Ebru Timtik, que moriguèt lo 27 d’agost en seguida d’una cauma de la fam, çò rapòrta Artı Gerçek.
 
Lo president de l’institucion, Mehmet Durakoğlu, a denonciat que l’acusacion es una “invencion” e qu’amaga de rasons politicas. El e divèrses membres del collègi son estats cridats a declarar davant lo procuraire.
 
 
Mòrta en cauma de la fam
 
Ebru Timtik fasiá partida de l’Associacion dels Avocats Progressistas (ÇHD). En març de 2019 foguèt condemnada a tretze ans e sièis meses de preson per “èsser membre d’una organizacion terrorista” dins un jutjament polemic ont la defensa critiquèt la manca d’accès a las pròvas e dins lo qual lo tribunal acceptèt de testimònis anonims. Amnestia Internacionala aviá demandat la mesa en libertat d’ela e de sos companhs.
 
Lo 14 d’agost, la Cort Constitucionala de Turquia refusèt un recors per liberar Ebru Timtik e Aytaç Ünsal a causa de lor marrida santat. Los jutges diguèron que i aviá “pas pro d’informacion sus l’urgéncia d’un perilh critic per lors integritat morala e materiala”. Doas setmanas puèi, defuntèt.