Après l’incendi qu’avaliguèt lo camp de Mòria, contunha lo transpòrt dels refugiats devèrs lo nòu camp provisòri que l’a bastit lo govèrn grèc malgrat las protèstas. Construch près de Panagiouda en un desenat de jorns, a la lèsta e d’un biais improvisat, lo sit es un dels camps de refugiats pus grand d’Euròpa mas tanben un dels mai indignes. La television de Catalonha, TV3, a vesitat lo sit, e lo rapòrt que ne fa es esglasiant.
 
Las organizacions umanitàrias e los abitants de la region denóncian que lo camp es insalubre e que l’emplaçament es nefast per que s’i passe l’ivèrn. Segon los pescadors de Panagiouda, lo vent del nòrd arrosarà lo sit amb l’aiga de la mar Egèa de sòrta que las gents moriràn del freg e de l’umiditat.
 
Los quites refugiats qu’i son an explicat que i a pas de lièches, que devon dormir sus un sòl irregular e que cada tenda aculhís 18 personas, sens prene en compte l’intimitat de las familhas. Las coas per obténer lo manjar son de tres oras, e per aquela rason
los refugiats an de sortir crompar dins un supermercat fòra del camp. Mas la majoritat an pas d’argent e de desenas de personas se passejan pel camp en demandant als autres refugiats quicòm per se noirir.
 
Una delegacion del grop de l’Esquèrra Europèa del Parlament Europèu a tanplan vesitat lo sit. Segon l’eurodeputat basco Pernando Barrena, lo sit “es extrèmament inquietant” e lo parlamentari europèu definís l’endrech coma una “trauc negre pels dreches umans”.
 
De son costat, la television de Catalonha a denonciat que lo trabalh de lors reportèrs foguèt a tot moment contrarotlat per la polícia e los foncionaris del Ministèri de las Migracions, e poguèron pas veire tot lo camp.
 
 

 

Ezin dugu onartu gizakiak egoera tamalgarri honetan izatea. EBren oinarrizko printzipio guztien aurkakoa da. Ez dugu Moria berririk nahi Europan. #MoriaCamppic.twitter.com/2IIEmLizWX

— Pernando Barrena MEP @EHBilduEP (@pernandobarrena) September 18, 2020