Actualitats
Multitudinària inauguracion de Marselha coma capitala europèa de la cultura de 2013
Del 12 de genièr de 2013 fins al 31 de decembre de 2013, la Ciutat Focèa serà capitala europèa de la cultura, amb la vila eslovaca de Košice
Dissabte passat, de ser, se debanèron los actes d’inauguracion per una festassa de la musica e de las arts contemporanèas; e foguèt una capitada de las bèlas. Cap a 22h, aperaquí 400 000 personas èran a far la fèsta per las carrièras de la Marselha. L’accès dempuèi las vilas vesinas èra quasi impossible perque lo centre vila èra enebit a las autos; los autocars e los trens èran tròp plens.
Dins un grand centre vila reservat als pedons, lo mond poguèron descobrir una Marselha imaginària, plena d’espectacles, d’exposicions, d’installacions, de bals e de performanças. Un còp alucat lo far de la fèsta, un espectacle sonòr e luminós abrandèt la vila.
Cal soslinhar un balet majestuós de jòcs d’aiga al Pòrt Vielh, la sosta de plumas blancas lançadas del cèl per d’acrobatas sul Cors d’Estienne d’Orves, las estonantas coreografias portadas per de desenats de dançaires sul Cors Belzunce...
Lo projècte cultural Marselha Provença 2013 amassa divèrsas municipalitats de Provença: aital, Marselha partejarà son succès amb Ais de Provença e Arle, entre d’autras, que comptan amb d’atraccions culturalas.
Long de l’annada, de centenats d’eveniments culturals e artistics se menaràn a tèrme dins tot lo territòri de Provença.
Dins l’evenimentàs, i aurà de larg per totas las disciplinas artisticas e culturalas, mai que mai per la dança contemporanèa, la gastronomia, las arts plasticas e scenicas. I aurà tanben de collòquis erudits sus l’art dins los espacis publics.
Per contra, l’espaci reservat a la lenga e la cultura occitanas es gaireben inexistent. E es aital que se fa de cultura dins un país sens prene en compte la cultura del país.
Red.
|
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#6 Quan parlatz der imperialisme de Tolosa non sai s'arrir o plorar. Eth solet imperialisme que patitz ei eth de París!
#5
S'es atal la plaça Maucalhau a l'ora d'ara, es segurament de la fauta de l'occitanisme tolosan o de Lengadòc. Totes los malastres de Bordèu existisson pr'amor de l'occitanisme (fòrça) imperialista de Tolosa e/o de Lengadòc. Tot un cadun va sap ...
#3 Lo Vielh Pòrt, quantes Catars cremats ? (Provocacion) A Bordèu, la plaça Maucalhau (dita plaça Sent Miquèu) èra lo centre popular, dab un mercat quasi quotidian. Uèi, jos pretèxte de boboïsacion deu quartièr, es netejada, es aseptizada, lo mercat es estat mudat suu cai de Garona. La plaça Maucalhau, nòste New Old Port.
#3 Bòna idèa de prepausar a la comuna de mediterraneisar- d'occitanisar la plaça, vist que l'amainatjament es p'ancara acabat : mai d'aubres per s'assostar dau solèu (platana, olivier, figuiera...), un bèu monument a Gelu, ecc. Poiriam far quauqua ren per assabentar lo monde d'aquò : article, peticien, ecc..
Domatgi que siechi pas sus plaça per vos ajudar.
Siau estonat de legir un comentari puslèu positiu a l'amenatjament dau "New Old Port" sus un sit occitanista.
Qunt mai bèla negacion de l'identitat mediterranenca de Marselha qu'aquesta plaça sensa vida, sensa rasigas localas ? Una plaça de la mena d'aquelei que s'atròvan ara de pertot en Euròpa de Nòrd, de Berlin fins a Manchester.
Ges de banc, ges d'aubre, ren per "s'espranhar la ragi dau soleu", coma disia Gelu dins leis "aubres dau cors", que ja, au segle XIX, l'amenatjament urban avia per tòca unenca de forabandir lei paures de la visibilitat. Tè, paure Victor, d'alhors ! Que la plaqueta que li èra dedicada sus lo Pòrt Vièlh es estada levada per laissar la plaça a n'aquesta orror mineralizada, vueja e sensa ges d'arma.
Per quant a la fèsta, apondrai ren de çò qu'ai ja pogut dire dins un parèu de cronicas... E qu'en fòra dei mèdias oficiaus, lei criticas son ben mens positiva que çò que se pòu legir aqui...
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari