CAPÇALERA PAIS INVISIBLE

Actualitats

InternacionalSocietat

De centenats de josieus hassiditas son encalats a la frontièra d’Ucraïna

Dins lor romavatge annadièr devèrs Uman, se tròban fàcia a una frontièra barrada per la covid-19, mas espèran aquí fins que los daissen intrar

| svaboda.org / RFE / RL
Qualques centenats de josieus hassiditas se tròban blocats dempuèi dimècres passat a la frontièra entre Bielorussia e Ucraïna. Vòlon aténher la vila d’Uman per lor peregrinatge annadièa, mas ongan an trobat la frontièra barrada per las mesuras ucraïnesas contra la covid-19. Los pelegrins i demòran en tot esperar que los daissen passar e an pas prevista l’opcion de se retirar.
 
Coma cada annada, de milièrs d’hassiditas de tota la planeta an fach lor romavatge devèrs Uman per i festejar la Rosh Hashana, lo cap d’an josieu, e vesitar lo tombèl del rabí Nakhman de Breslev. L’an passat, i anèron environ 30 000 romieus, mas ongan es diferent; entre las mesuras presas contra la covid-19, Ucraïna barrèt sa frontièra a totes los estrangièrs dimècres passat, lo 16 de setembre. Mas Bielorussia l’a pas barrada. En consequéncia, de milièrs de pelegrins son demorats encalats entre los dos ponches de contraròtle frontalièr. Los pelegrins, sortits mai que mai dels Estats Units, de l’estat francés e d’Israèl, vòlon pas renonciar d’arribar a lor destinacion e se son installats aquí, dins de condicions precàrias, en esperant qu’Ucraïna lor permeta d’intrar.
 
Per ara, las autoritats ucraïnesas an solament permés l’intrada dels qu’an de parents en Ucraïna. Mentretant, de centenats de personas atendon sul ponch frontalièr amb l’espèr qu’enfin lor serà permés d’intrar. Totun, sembla qu’aquò se passarà pas, compte tengut del nombre recòrd de nòvas infeccions de la covid-19 que lo patís aquel país.
 
De milièrs de pelegrins èran arribats a Uman abans lo barrament de las frontièras e vesitan lo santuari jos d’extrèmas mesuras de seguretat impausadas pel cònsol màger de la vila, que vòl pas far cap d’excepcion.
 
De son latz, Israèl a fach una crida per que los ciutadans israelians que se tròben encalats a aquela frontièra tornen en Israèl e se sometan a las mesuras de quarantena tanlèu i arribar. De soslinhar qu’Israèl a realizat un segond confinament, parièr al que visquèrem dins la prima passada, a causa d’una inquietanta segonda èrsa d’infeccions de la covid-19.
 
Pasmens, plusors hassiditas son convencuts que la solucion per metre lo ponch final a la pandemia es d’arribar fins a Uman e aquí pregar lo rabí. “La situacion es fòrça complicada, ara, e per aquela rason sèm aicí a far tot çò possible per i arribar e pregar pel Mond entièr, per metre lo ponch final a aquesta plaga terribla”, çò ditz a la Television de Catalonha un dels romieus encalats.

 
 
 

 




 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article