Los procuraires del Parquet Nacional Financièr (PNF) an interrogat lo president de la Federacion Francesa de Rugbi (FFR), Bernard Laporte, per sos ligams amb lo miliardari Mohed Altrad, proprietari del club de Montpelhièr. Laporte, Altrad e tres autras personas foguèron meses en gàrdia a vista ièr dimars, çò que raportèt a l’AFP lo quite PNF. Los autres detenguts son Serge Simon, vicepresident de l’FFR, Nicolas Hourquet, responsable de las relacions internacionalas de l’FFR, e Claude Atcher, director general del comitat d’organizacion de la Copa del Mond 2023 de rugbi, prevista dins l’estat francés.
 
Laporte, èx-ministre dels espòrts e vicepresident del Word Rugby (l’organisme que gerís mondialament los rugbis de XV e VII), fa l’objècte d’una enquista preliminara de corrupcion dobèrta en 2017 pel PNF après un rapòrt dels inspectors del Ministèri dels Espòrts. Segon aquela enquista, Laporte es sustot suspècte d’aver favorizat lo Montpelhièr Erau Racing (MHR) en intervenent al près de la comission d’apelacion de l’FFR per adocir las sancions contra lo club, a la fin de junh de 2017. D’efièch, entre lo 29 e lo 30 de junh de 2017, se prenguèt cèrtas decisions per modificar una multa que la deviá pagar l’esquipa de Montpelhièr, e l’emenda passèt de 70 000 a 20 000 èuros e s’eliminèt la sancion de jogar una partida a pòrta barrada.
 
Tres meses abans, lo grop Altrad, especializat dins los materials de construccion, èra vengut lo primièr esponsòr malhòt del XV de França, abans de sosténer la candidatura francesa, finalament victoriosa, per l’organizacion de la Copa del Mond 2023.
 
Laporte se presenta a la reeleccion coma president de l’FFR lo 3 d’octòbre que ven.