La justícia espanhòla ven de destituir lo president de la Generalitat de Catalonha. La Cort Suprèma espanhòla a confirmat la pena d’un an e mièg d’inelegibilitat contra Quim Torra per aver refusat de retirar una bandeiròla que reclamava la libertat dels presonièrs politics. A mai los jutges confirman que Torra deu pagar una multa de 30 000 èuros.
 
Torra es lo primièr president de la Generalitat de Catalonha que ven destituit en plen exercici, e lo tresen consecutiu a èsser represalhat per la justícia espanhòla. Son predecesor, Carles Puigdemont, es en exili en Belgica del temps qu’Artur Mas lo declarèron inelegible per aver organizat una consultacion populara lo 9 de novembre de 2014.
 
Los jutges considèran que la bandeiròla èra pas una question de libertat d’expression mas una accion de desobesisença “testuda e obstinada”.
 
Mentretant, Quim Torra contunha uèi e far sa jornada normala coma president e seguirà atal mentre que receba pas cap de notificacion. Se presentan ara divèrsas ipotèsis sus l’avenir de las institucions catalanas, qu’ensajarem de raportar coma cal sus Jornalet. Vilaweb es a raportar sus aqueste afar en dirècte.


Tot aquò per una bandeiròla
 
Per las eleccions legislativas d’abril de 2019, lo Conselh Electoral de l’estat espanhòl aviá enebit tot simbòl de sosten als presonièrs politics catalans dins los edificis e mèdias publics. O faguèt en seguida del partit espanholista Ciutadans, que considerava que s’agissiá de simbòls partisans que podián influenciar lo vòte.
 
D’efièch, lo govèrn espanhòl aviá demandat a la polícia catalana, los Mòssis d’Esquadra, que levèsson eles los ribans jaunes. E dins aquel sens d’agents intrèron dins las escòlas per retirar totes los ribans jaunes del temps que la television de Barcelona, Betevé, se vesiá obligada de levar l’etiqueta “presonièrs politics” de son sit web d’informacions.
 
Quand lo Conselh Electoral prononcièt son interdiccion, lo president Quim Torra refusèt de retirar la bandeiròla del palais de la Generalitat. Puèi, en seguida de la demanda del mediator de Catalonha, Rafel Ribó, cambièt la bandeiròla per una autra sens riban jaune. Enfin, foguèt forçat de la levar, e en sa plaça n’i placèt una autra que revendicava la “libertat d’opinion e d’expression” en mençonant l’article 19 de la Declaracion Universala dels Dreches Umans.