Sèt entrepresas auvernhatas (Aubert & Duval, Echalier, EDF Auvèrnhe, Limagrain, Michelin, Rockwool e Vorvic [Volvic]) s’engatgèron, lo 14 de decembre passat, a far nàisser la Fondacion Linha dels Puèis-Falha de Limanha.

Aquelas entrepresas se mobilizèron per sosténer l’inscripcion de la Linha dels Puèis e de la Falha de Limanha sus la lista del patrimòni mondial de l’UNÈSCO. Mas, après sosténer la candidatura, decidiguèron de s’implicar mai fòrtament dins la gestion e preservacion de l’endrech e se son amassadas en una fondacion d’entrepresas.
 
Al delà d’èsser una basa suplementària per la candidatura, la fondacion serà egalament un mejan de perennizar l’implicacion dels sòcis economics. Lor vocacion es de participar a la mesa en marcha de las accions del plan de gestion, que s’orienta vèrs la preservacion e valorizacion dels païsatges, vèrs lo desvolopament de las activitats economicas localas e mai vèrs la recèrca e difusion de las coneissenças. A l’ora d’ara, es la sola fondacion dedicada a un endrech candidat a patrimòni mondial.
 
La fondacion serà dotada d’un capital de 350 000 èuros, aportat pendent cinc ans per sos fondadors, e poirà créisser amb de dons d’entrepresas e de particulars. Aquelas contribucions permetràn de finançar la creacion d’un observatòri dels païsatges, la disposicion d’itineraris e de ponches d’acuèlh, la mesa en marcha de supòrts pedagogics e senhaletics pels viatjaires, lo melhorament de l’integracion païsatgistica dels volcans, lo sosten als trabalhs scientifics mejançant de borsas de recèrca o la difusion de las publicacions, etcetèra.