Dissabte passat, mentre que la tempèsta Alex devastava l’èst d’Occitània, Venècia visquèt un jorn istoric: s’activèt pel primièr còp Mose, un sistèma de restancas mobilas que permet d’isolar la laguna de Venècia de la mar Adriatica e atal d’evitar que la marèa nauta inonde la vila.
 
De bon matin, las autoritats alcèron las 78 restancas mobilas. Atal, s’empediguèt un autre episòdi d’aiga nauta, coma li dison los venecians, qu’inonda regularament la vila quand i a de tempèris. A mai, sus la Plaça de Sant Marc s’installèt una planca per facilitar lo passatge dels pedons en cas que i aguèsse d’aigats. Mas Mose empachèt ben l’aiga nauta e sus la plaça, qu’es lo ponch pus bas de la vila, i aguèt pas que qualques sompets de l’aiga de la pluèja.
 
De soslinhar qu’en novembre de l’an passat Venècia visquèt una de las piègers inondacions de son istòria.
 
 
Una mesa en òbra marcada per la corrupcion
 
Mose es l’acronim de Modul Experimental Electromecanic (MOdulo Sperimentale Elettromeccanico) e tanben lo biais italian de nomenar Moïses, lo profèta que separèt las aigas de la mar Roja. S’agís d’un projècte d’engenhariá dels mai importants d’Euròpa. An calgut 17 ans per sa mesa en òbra dins un encastre plan polemic: mai de 50 personas son estadas detengudas per corrupcion restacada amb sa construccion.