Bon, aquò virava de còps al purgatòri mercé a las partidas televisadas del campionat australian (BeInSport) e a las magròtas difusions de rescontres dels Dragons (L’Équipe). Aqueste dimenge, vòstre servidor se poguèt tornar assetar dins las tribunas de Brutus per seguir lo rescontre Dragons-Wakefield. Es un pauc particular: totòm en masca (levat jogaires e arbitres!), de pegasolets suls sètis per interdire de s’assetar sus d’unes, la barraca dels churros e de las pralinas barrada, cap d’amassaire de balon, los jogaires angleses mandats dins los vestiaris de la tribuna opausada, pas l’ombra d’un sosten anglés, Els Segadors que passa en play-back en plaça d’èsser cantat sus la pelena per Albert Bueno, mas quand la pauma se met a córrer, que las atacas se desvolopan, que las defensas placan e replacan, que cal romegar contra una decision falsièra de l’arbitre, que los punts montan al planchòt, òm se ditz que sèm tornarmai sul camin del Paradís…
 
 
La bona setmana dels Dragons
 
Dimècres de ser, los Dragons afrontèron una esquipa de Leeds rejovenida e tornèron amb la victòria: 34-6.
 
Dimenge, a domicili, i agèt de retard a l’alumatge. Pendent una mièja ora, los Sang e Aur balhèron de lagui als sostens, semblèron de mancar de serenitat, faguèron de fautas de man, mas capitèron de plantar dos ensages dins las darrièras cinc minutas. Al retorn del vestiari, se vegèt una sola formacion sul terren: los catalans. Mençon especiala pel pilar Sam Kasiano que trauca sus 50 mètres, servís Sam Tomkins que fixa l’arrièr e lo torna lançar a l’ensag, ensag aplaudit per un estadi dreit. Amb sèt ensages marcats e una victòria 40-8, los Dragons se tornan plaçar dins lo quatuor de cap e espèran de contunhar la tièra de victòrias tre aqueste divendres 9 a 7 oras un quart del sèr amb la recepcion d’Hull KR.
 
 
Leeds-Salford en finala de la Cup
 
Dissabte, se joguèt las mièjas finalas de la Cup. Leeds agèt plan rason de faire virar sos jogaires. Amb son esquipa tipe, los Rinocèros se qualifican per la finala: victòria neta fàcia a Wigan: 26-12.
 
Fins a un quart d’ora de la fin de la partida, los Lops de Warrington pensèron ben de tornar a Wembley per defendre lo trofèu. Menavan 22-12, mas las darrièras minutas foguèron favorablas als Diables Roges que s’impausan mercé a dos ensages transformats: 24-22.
 
Leeds e Salford jogaràn la finala dissabte 17 d’octòbre a Wembley dins un estadi voide.
 
 
NRL: las pelhòfas respèctan la logica
 
Aquesta dimenjada, se debanava lo primièra torn de las fasas finalas del campionat australian. Las quatre partidas coneguèron lo meteis debanament: la formacion la mens plan classada que domina la debuta de la partida, mas que plega dins lo segond temps.
 
Atal, dins lo naut del tablèu, los Polets dobrisson la marca amb dos ensags. Las Pantèras reagisson e menaràn 28-10. Los campions ensajaràn de contestar aquel avantatge mas tornaràn a un punt: 29-28.
 
Las Anguialas de Parramatta marcan d’entrada contra la Tempèsta de Melbourne, mas van pèrdre sus nafraduras los dos alièrs e, dins una partida vodada a l’ofensiva e a una circulacion maximala e permanenta de la pauma, arribaràn pas de contrar Melbourne que ganha: 36-24.
 
Atal, lo primièr Penrith e lo segond Melbourne son ja qualificats per las mièjas finalas.
 
Dins lo bas del tablèu, Cronulla dobrís la marca, domina lo primièr temps mas amb un ensag sus intercepcion just abans la pausa e un autre, tre la represa, sus una penalitat jogada lèu-lèu a la man, Canberra va tornar a nautor de las Làmias abans de s’envolar cap a la qualificacion: 32-20.
 
La partida entre Newcastle e los Lapinons se dobriguèt a la primièra minuta amb un challenge del capitani dels Cavalièrs per contestar una decision arbitrala. Lo bunker dona rason al jogaire: mesclanha, palma a l’ala e ensag d’entrada! Los Lapinons faràn la diferéncia en fin de primièr temps e senhorejaràn sus la fin de la partida: 46-20.
 
Los barratges de qualificacion per las mièjas finalas opausaràn divendres Polets e Canberrà e dissabte las Anguialas reçaupràn los Lapinons. De mancar pas!
 
 
Represa al país
 
Las formacions de Nacionala 1 son las primièras del país a tornar trapar las pelenas: Tonens bat Gratentor: 46-18 e Realmont va ganhar a Ramonvila: 32-10.

 
 
 
 
Alan Roch