La Cort Europèa dels Dreches Umans a reclamat a Turquia qu’arrèste preventivament son intervencion dins lo conflicte d’Artsakh, a la demanda d’Armenia. A mai, la cort d’Estrasborg demanda que totes los estats engatjats dins aquel conflicte, d’un biais dirècte o indirècte, respècten los dreches de la populacion civila d’aquel territòri tanben conegut coma lo Naut Karabagh. La setmana passada, aquela meteissa cort reclamèt a las autoritats d’Azerbaitjan que cessèsson los atacs militars contra Armenia.
 
Dempuèi la fin de setembre, Armenia e Azerbaitjan mobilizan lors armadas après los grèus afrontaments militars en Republica d’Artsakh. L’armada azèri ataquèt per divèrses fronts la frontièra que separa aquel estat de populacion armènia e sostengut per Armenia. En julhet, los combats transfrontalièrs entre Armenia e Azerbaitjan avián ja inquietat la comunautat internacionala. Mas la portada d’aquesta nòva escalada, amb la lei marciala decretada tant en Artsakh coma en Armenia e Azerbaitjan, fa crénher una vertadièra guèrra dobèrta entre los dos païses e sustot l’intervencion de las doas grandas poténcias de la region del Caucàs, Russia e Turquia.