Lo èx-policièr de Minneapòlis, acusat de l’assassinat de George Floyd, es en libertat condicionala après pagar una caucion d’un milion de dolars. Se nomena Derek Chauvin e a 44 ans. Es acusat d’aver tuat lo ciutadan afroamerican lo 25 de mai passat en l’estofant amb lo genolh sul còl. Aquel crime foguèt enregistrat en vidèo e a brandit lo Mond entièr. Dins aquel enregistrament vidèo se pòt veire Chauvin, alavetz policièr, qu’escana Floyd amb son genolh pendent mai d’una minuta del temps que Floyd crida socors e ditz que pòt pas respirar. De fach, aquela frasa “I can’t breath” (pòdi pas respirar) es venguda lo crit mai getat dins las manifestacions antiracistas als Estats Units.
 
S’espèra que Chauvin comparesca davant los jutges en març de l’an que ven. Fins ara, se trobava dins una preson de nauta seguretat de Minnesòta, d’ont èra sortit solament per comparéisser davant lo jutge, l’11 de setembre passat. L’èx-agent, de 44 ans, deurà anar al procès amb sos collègas, tanben expulsats del còrs, acusats de complicitat.
 
Per ara sabèm pas cossí Chauvin a obtengut lo milion de dolars per pagar la caucion. Segon Associated Press, lo fons que l’associacion dels policièrs de Minnesòta a previst per aquelas questions i a pas res a veire.