Lo Conselh de Seguretat de l’ÒNU a sostengut l’intervencion francesa en Mali, ja que l’a declarada legala. A presa aquela decision en una reünion extraordinària, convocada a la demanda de França. Lo govèrn francés a recebut tanben lo sosten de l’oposicion francesa. Pasmens, l’intervencion estrangièra en Mali se limita a las operacions francesas, e mai se son a esperar un desplegament de las tropas africanas sostengudas per l’ÒNU.

Lo primièr ministre francés, Jean-Marc Ayrault, a mostrat la siá satisfaccion pel sosten a la guèrra venent dels autres grops politics de l’Assemblada Nacionala. “La reünion qu’avèm mantengut confirma, se caliá, la capacitat del nòstre país per s’unir quand son en jòc las valors de la nòstra republica. Es lo nòstre actiu mai preciós davant la menaça dels grops terroristas”, çò a dich Ayrault.
 
Ça que la, l’oposicion vòl que l’implicacion francesa en Mali siá limitada dins lo temps, en d’operacions solament aerianas e amb lo sosten internacional.
 
París diguèt que caliá agir d’urgéncia per arrestar l’ofensiva islamista que menaçava la capitala, Bamako, e amb ela tot lo país. E assegura que la siá accion a accelerat l’enviament d’una fòrça militara africana jol parapluèja de l’ÒNU, que començarà d’arribar en Mali dins los jorns avenidors. Mas Nigèria, que comandarà la mission, a ja avertit que cal de temps per qu’aquelas tropas sián operacionalas.
 
A l’ora d’ara, França compta amb lo sosten logistic d’autres païses e amb las siás pròprias fòrças e las de l’armada maliana per conténer las milícias islamistas, que diluns passat se retirèron vèrs qualques vilas del nòrd e lancèron una contraofensiva per conquistar, amb succès, la vila de Diabali.