Lo president de Mexic, Andrés Manuel López Obrador, a enviat una letra al papa Francés ont sollicita d’el “coma representant de la Glèisa Catolica” e a “la monarquia espanhòla” que demanden publicament excusa als pòbles originaris d’America per “las atrocitats e lo sacatge” de la conquista.
 
La letra la mandèt dimenge, a l’ocasion de la velha del 12 d’octòbre, dins lo qual l’estat espanhòl celèbra sa fèsta nacionala, lo dich jorn de l’Ispanitat, que rend omenatge a la descobèrta d’America per Cristòl Colomb en 1492. López Obrador afortís que “pr’amor d’aquela efemerida, tant la glèisa catolica coma la monarquia espanhòla e l’estat mexican devèm demandar publicament excusa als pòbles originaris que patiguèron d’atrocitats pel pilhatge de lors bens e tèrras e per los aver someses de la conquista de 1521 fins al passat recent”.
 
A mai, la letra soslinha que totes aqueles pòbles originaris son ara marginalizats, paures e victimas del racisme e que meritan “un engatjament sincèr que jamai pus se cometrà pas d’actes irrespectuoses de lors cresenças e culturas”.
 
La letra la portèt personalament al pontife la femna del president de Mexic, Beatriz Gutiérrez Müller, qu’èra a vesitar Roma.
 
Aqueste fach seguís una demanda que la faguèt  López Obrador a l’estat espanhòl en 2019, quand envièt una letra al rei Felip VI per tal de sollicitar d’aqueste la reconeissença dels grèuges de la conquista de Mexic. A aquel moment, lo ministre dels afars exteriors d’alavetz, Josep Borrell, li respondèt: “Evidentament, Espanha demandarà pas tardièrament excusa”.

 

Se entrevistó Beatriz con el papa Francisco, a quien respeto y admiro como dirigente religioso y jefe de Estado. Me comentó que la trató con afecto y expresó su voluntad de mantener buenas relaciones por el bien del pueblo. Aquí la carta que le escribí: https://t.co/mEGZAdAaAcpic.twitter.com/x0fG2NpHJj

— Andrés Manuel (@lopezobrador_) October 10, 2020