Divendres, Canberra capitèt d’escartar los campions, los Polets de Sydney, amb un resultat 22-18 mercé a un ensag sus un còp de pè de seguir que prenguèt a contrapè l’arrièr Tedesco.
 
Dissabte, Parramatta e Lapinons agèron cadun son temps de dominacion. La partida se joguèt a un quart d’ora de la fin. Los Lapinons menavan 20-18. Moses ensagèt d’encapar una penalitat per tornar a nautor, mas sa palma tustèt lo pal. Recuperacion pels Lapinons qu’anavan marcar en fin de la tièra de tenguts per véncer fin finala 38-24.
 
Las mièjas finalas opausaràn Melbourne e Canberra divendres e las Pantèras contra los Lapinons dissabte.
 
 
Los Dragons en tresena posicion
 
Divendres de ser, los Dragons Catalans recebián Hull KR. Los angleses resistiguèron un brave moment mas anavan encaissar quatre ensages abans la pausa (22-0). Dins lo segond temps, los catalans dominavan e concretizavan lor superioritat amb dos ensages. Hull KR salvava l’onor per pèrdre 34-4.
 
Coma Wigan ganhava cò de Warrignton 18-14, vaquí los Sang e Aur installats a la tresena posicion al classament abans d’anar desfisar Wigan dijòus sus l’estadi dels Lops de Warrington. La tòca dels catalans es de servar una plaça dins los primièrs quatre per se qualificar per las mièjas finalas. Un polit objectiu…
 
En ganhant 20-16 a Wakefield, St Helens s’installa fòrtament en cap de classament.
 
 
Finala de Cup dins un estadi voide
 
Aqueste dissabte 17, dins un estadi de Wembley sens espectators en rason de las règlas sanitàrias en Anglatèrra, se debanarà la finala de la Cup entre Salford e Leeds.
 
 
La represa en Elèit 2
 
Aquesta dimenjada, se tenián las partidas de represa d’Elèit 2. Dissabte, Carpentràs domina Lion 28-14 e Pià bat l’Escura 34-10.
 
Dimenge, sus l’estadi de Vilamostausson, Vilagalhenc-Argon s’impausa fàcia als Lops de Vilafranca: 38-20. Tolon es plan mai fòrt que Selon (56-4) e Entraigas sèrva un avantatge sus Baó: 20-18.

 
 
 
Alan Roch