Lo president de Quirguizstan, Sooronbay Jeenbekov, a destituit tot lo govèrn e a assegurat que demissionariá tanlèu establit un nòu govèrn e elegit un nòu primièr ministre. Lo president a afirmat que la legitimacion d’un primièr ministre e d’un executiu requeririá  l’acòrdi del parlament e un òrdre presidencial.
 
Lo primièr ministre, Kubatbek Boronov, a acceptat sa destitucion fàcia a las pressions de la carrièra.
 
Quirguizstan se tròba dins una crisi politica grèva en seguida de las eleccions del 4 d’octòbre passat dins las qualas solament doas fòrças opausantas intrèron al parlament. Lo resultat foguèt considerat coma una frauda pels partits qu’arribèron pas al lindal del 7% requerit per obténer una representacion, e desencadenèt de susmautas per carrièras dins la nuèch del diluns 5 d’octòbre.
 
L’endeman, la Comission Electorala Centrala anullèt las eleccions, mas las protèstas an pas cessat e maites politicians an demandat que se dobrisca un procès de destitucion de Jeenbekov se renóncia pas a son mandat de president.