L’Agéncia Espaciala Europèa (ÈSA) a causit Airbus per transportar de Mart fins a la Tèrra los primièrs escapolons de ròcas marcianas, çò rapòrta La Dépêche que cita un comunicat d’Airbus. La societat tolosana mandarà a la Planeta Roja una sonda nomenada ÈRO (sigla anglesa d’orbitador de retorn sus la Tèrra). ÈRO i anarà a bord d’Ariane 6 en 2026 per tal que las mòstras marcianas atengan la planeta nòstra en 2031.
 
L’operacion de recuperacion de l’escapolon es fòrça complèxa. La sonda ÈRO, de 6 tonas e 6 mètres de naut, virarà a l’entorn de la Planeta Roja esquipada de 144 m² de panèls solars. Aquí, mentre qu’orbitarà, l’ERO serà en comunicacion amb los aparelhs de la mission de la NASA que son ja sus plaça. Los espleches marcians prelevaràn d’extraches del sòl e qualques ròcas e o metràn a l’interior de 36 tubes que seràn lançats en orbita dins un receptacle de la pagèla d’un balon de basquet. Serà alavetz la mission d’ÈRO de capturar aquel balon, de lo sagelar e de lo menar sus la Tèrra.
 
La mission se desvoloparà dins un total de cinc annadas. La valor del contracte del ERO se calcula a 491 milions d’èuros.

 

Airbus selected by @esa to design and build ERO (Earth Return Orbiter), the first ever spacecraft to bring samples back to Earth from Mars!
https://t.co/1BJ7TMzM3G#SpaceMatters#ToMarsAndBack#ExploreFarther#MarsSampleReturnpic.twitter.com/CG45XDoNOy

— Airbus Space (@AirbusSpace) October 14, 2020