Novèls recòrds de pollucion en China Malgrat de declaracions rassegurantas e nombrosas, lo govèrn chinés pena a luchar contra l’esmòg extrèmament dense qu’envasís, cada ivèrn, las grandas vilas del nòrd de China.
Aquel esmòg, pro rare en Occitània, es una nèbla d’origina industriala que resulta principalament de l’emission d’elements quimics dins l’atmosfèra. Quand es particularament densa, cobrís las vilas d’un mantèl grisastre o brunastre que pòt demorar estacionari mai d’una setmana e que pòt aver de consequéncias plan grèvas per las personas fragilas.
China demòra un dels lòcs mai polluïts del Mond e cada ivèrn las grandas aglomeracions del nòrd del país coneisson de pics de pollucion deguts en bona partida al sistèma de calfatge al carbon que libèra de quantitats plan importantas de CO2 e d’autres polluents.
Demest totes aqueles problèmas d’environament, las particulas finas son consideradas coma particularament dangeirosas. De fach, lor dimension reducha las fa penetrar prigondament dins lo sistèma respiratòri e los palmons luchan dificilament contra elas se son tròp nombrosas.
Ongan lo govèrn chinés acceptèt de cambiar son sistèma de mesuras e d’utilizar de mai en mai las nòrmas internacionalas que mesuran las particulas finas d’una talha de 2,5 microns o mens. Abans aquela decision las mesuras se limitavan a las particulas de mai de 10 microns, relativament mens dangeirosas.
Dimenge passat, l’ambaissada estatsunidenca de Pequin, que fa sas pròprias mesuras, relevèt 755 μg per m3 (siá mai de 30 còps lo nivèl maximal conselhat per l’OMS qu’es de 25 μg per m3). Dissabte, lo nivèl èra encara mai naut amb 993 μg per m3. A partir de 300, l’OMS conselha a totas las personas fragilas (especialament los nenons e los ancians) de demorar a l’ostal, perque aquel nivèl pòt nòser grèvament a la santat. Un nivèl de 1000 es clarament nociu per tot lo mond.
Diluns, dins lo Quotidian del pòble, jornal oficial del Partit, lo govèrn faguèt assaber qu’aviá l’intencion d’investir 43 miliards d’euros dins la lucha contra la pollucion a Pequin per los tres ans que venon. A l’ora d’ara la politica oficiala es de s’ocupar d’aquel problèma major de China.
Lo desvolopament economic foguèt basat, fins ara, unicament subre l’economia, las consideracions ecologica essent consideradas coma segondàrias. Ça que la, la populacion es de mai en mai preocupada per aquestas questions de santat publica e lo govèrn, conscient de las limitas de son modèl actual, ensaja de cambiar l’orientacion de sa politica economica cap a una politica mai sostenibla.
Simon Montsegur
Universitat normala d’Anhui
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Seriá per rire se tota aquela tubadissa fòsse pas per nos porgir de trastes qu'emplenan, a cò nòstre fin finala, las escobilhas de degalhs de plastòc e de ferratalha. I cal tornar faire de jòcs olimpics, es lo sol biais per qu'arresten un temps lors fabricas, al mens dins lo parçan de Beijin.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari