Benaürosa Austràlia ont la competicion se perseguís quasi normalament amb un public important. N’èrem al moment de las “finalas preliminaras” que se tenguèron de dos biaisses diferents.
 
Divendres, amb quatre ensages dins la primièra mièja ora, Melbourne assuquèt Canberra que poguèt pas contestar la superioritat de Cameron Smith e de sos collègas que ganhèron 30-10.
 
Dissabte, las Pantèras de Penrith demorèron duscas a la fin d’una partida per balèses jos la menaça dels Lapinons, mas s’impausèron 20-16.
 
En finala, dimenge, a l’ANZ-Stadium de Sydney, se traparà doncas los primièrs dos del classament per un rescontre que s’anóncia de tria.
 
 
Un tombat ofrís la Cup a Leeds 
 
Es dins un estadi de Wembley sens espectators aqueste dissabte que s’afrontèron Salford e Leeds en finala de la Cup. La darrièra victòria de Salford remontava a 1938 e lor precedenta participacion a la finala a 1969. Leeds n’èra a 13 victòrias, las doas darrièras en 2014 e 2015.
 
Leeds marcava d’intrada, mas Salford replicava amb un contra que travèrsa tot lo terren. Los Rinocèros prenon l’avantage amb un novèl ensag justa abans la pausa: 12-6.
 
A la represa, mercé a dos ensages, e una transformacion, Salford mena de 4 punts: 16-12. A un quart d’ora de la fin, l’alièr Handley marca dins lo recanton per egalizar. Un tombat de Luke Gale a 4 minutas del tèrme ofrirà un quatorzen trofèu a Leeds: 17-16.
 
 
Superliga: a la mercé del coronavirús
 
Lo campionat de la Superliga viu jorn per jorn, segon la resulta dels tèstes de contraròtle e d’un calendièr en perpetuala reorganizacion. Atal, de jogaires de Wigan pertocats per la covid menèron a l’anullacion del desplaçament dels Dragons en Anglatèrra aqueste dijòus 15. D’aicí al 15 de novembre, los Dragons son dins l’obligacion de disputar al mens 6 partidas per arribar a 18 jogadas que li permetrián de poder èsser classats e eventualament qualificats se demòran dins una dinamica de victòrias. Per ara, puntan a la tresena plaça.
 
Darrièr Saint Helens e Wigan, Warrington pren la quatrena plaça en batent dimars 32-6 Leeds qu’aviá lo cap a la finala de la Cup.
 
En batent Huddersfield 18-16, Hull FC lèva als Gigants lo sòmi d’una possibla qualificacion per las mièjas finalas.
 
En principi, los Sang e Aur van reçaupre 3 còps en seguida a Brutus: Hull FC aqueste dijòus 22, puèi Warrington lo diluns 26 e lo primadièr Saint Helens lo dijòus 5, mas una partida en retard se poiriá ajustar pel diluns 2 de novembre.
 
 
Sens vestiaris e sens dochas
 
En mai de las mesuras de cobrifuòc, cèrtas prefecturas (Aude, Tarn,…) interdison pas la practica esportiva, mas l’utilizacion dels vestiaris e de las dochas. Consequéncia: pas possible de jogar dins de bonas condicions e d’assegurar una bona recepcion dels jogaires. Ajustarem que los estanquets dels estadis devon èsser barrats. Las partidas remesas se multiplican doncas. S’espèra una decision lèu de la federacion per saupre dins quinas condicions las competicions se van poder téner o se se va caler tornar metre en pausa, çò que mancarà pas de pausar de problèmas grèus als clubs.
 
Tres rescontres d’ Elèit 2 se joguèron: Entraigas ganhèt a Selon (40-22), l’Escura ganhèt contra Vilagalhenc-Argon (22-16)e festenal de punts a Vilafranca ont los Lops baton Tolon (50-30).
 
 
 
Alan Roch