Los occitans de las Valadas, los gardiòls e totes los ciutadans italians en general auràn lèu lo vaccin d'Oxford contra la covid-19 a lor posita. Lo primièr ministre, Giuseppe Conte, a anonciat qu'al "començament de decembre arribaràn los primièrs dos o tres milions de dòsis. Puèi, n'arribaràn d'autres milions", çò rapòrta La Repubblica. Segon Conte, "la Comission Europèa a encargat Astra Zeneca e d'autras societats de qualques centenats de milions de dòsis."
 
Lo ministre italian de la santat, Roberto Speranza, diguèt que los primièrs a recebre lo vaccin seràn los trabalhadors de la santat, las fòrças de l’òrdre e los personals intèrnes de las residéncias d'ancians. Puèi, caldrà esperar de meses o d'ans per que totòm aja accès al vaccin. Se considèra que l'immunitat dels vaccins comença aperaquí un mes après recebre la dòsi e, de mai, la majoritat dels vaccins desvolopats los inocular en doas dòsis, la segonda un o dos meses après la primièra.
 
Aquò serà possible se las darrièras estapas del desvolopament del vaccin d’Oxford se complisson a la fin d’octòbre. Un autre candidat es lo vaccin estatsunidenc que lo desvolopa Moderna, qu'es previst que publique los resultats de sos ensages en novembre.
 
Per ganhar de temps, an començat de produire las dòsis abans d’acabar los ensages scientifics. L’Agéncia del Medicament Europèu a començat tanben la revision de las donadas scientificas per las omologar.