La Cort Suprèma espanhòla ven de ratificar l’interdiccion del catalan dins las comunicacions entre las administracions del País Valencian, de Catalonha e de las illas Balearas, que son obligadas d'emplegar exclusivament l’espanhòl. Los sindicats d’ensenhaires valencians e la Generalitat Valenciana avián demandat l’anullacion d’aquela senténcia, que la raportàvem en junh passat sus Jornalet. Mas los jutges la mantenon senténcia e mai lor fan pagar los còstes d’aquel darrièr jutjament, çò rapòrta Levante. Ara, la Generalitat a anonciat que depausarà un recors davant la Cort Constitucionala espanhòla.
 
La decision de la cort, situada a la cima de l’organizacion del poder judiciari en Espanha, donava rason a una senténcia de la Cort de Justícia del País Valencian que respondiá a una demanda de l’avocat general de l’estat espanhòl en novembre de l’an passat. Lo govèrn espanhòl, d’efièch, considèra que lo govèrn valencian deu comunicar en espanhòl amb los govèrns balear e catalan, çò que lo poder judiciari ven de confirmar. A mai, l’anullacion del catalan coma lenga d’usatge preferencial dins l’administracion valenciana viòla lo decret sus l’usatge de las lengas oficialas al País Valencian aprovat pel govèrn regional.
 
Demest las nombrosas accions de protèsta, cal remembrar la reaccion de las tres administracions que se diguèron “bonjorn” en catalan suls rets socials.