Eth Parlament Europèu que vò qu’eth govèrn espanhòu e dongue mès marge as comunautats autonòmes entà redusir eth deficit, en tot compartir era flexibilitat que Brusselles da a Mariano Rajoy. “Es esfòrci de consolidacion fiscau se deu compartir entre es diferentes administracions de manèra justa, en tot tier en compde es servicis que provedissen”, çò afirmèc agèr dimèrcles eth plen dera Eurocramba, en un rapòrt aprovat damb eth sosten de populars, socialistes, liberaus e verdi. Es eurodeputats tanben planhen eth “risc” que compòrte qu’es autonomies non poguen requectar e auer recorsi pròpris e “se financen principauments des transferéncies deth govèrn centrau”.

Era Eurocramba que reclame tanben era supression des ministèris qu’an transferit es sues competéncies mès qu’“encara existissen sense cap de poder ne cap de prètzhèt concrèt”. “Aqueri subsectors de govèrn hèn era administracion generau mès inefiicaça e desperdiciaira e los calerie eliminar, coma part des esfòrci de consolidacion fiscau”, ce exigís era Eurocambra, en aqueth rapòrt der eurodeputat italian deth Pòble dera Libertat Alfredo Pallone, deth Partit Popular Europèu, aprovat a man auçada.
 
En Estat espanhòu, es ministèris de Sanitat, Educacion e Cultura que contunhen en foncionament maugrat non auer competéncies e era Eurocramba considère qu’era sua supression e contribuirie a redusir eth deficit public. “Perqué auem de besonh un ministèri espanhòu de Sanitat quan totes es competéncies son es mans des regions?”, ce a planhut er eurodeputat de CiU Ramon Tremosa, autor de diuèrsi esmendaments deth rapòrt aprovat en plen. “Era existéncia d’aqueri ministèris non a cap de sens e representen ua despensa que poderie èster emplegada entà redusir eth volum deth deficit sense un impacte tan dur sus era coesion sociau coma es retalhades en sanitat e educacion”, ce a denonciat.
 
Eth Parlament Europèu que sosten era reivindicacion deth conselhèr d’Economia de Catalonha, Andreu Mas-Colell, qu’er objectiu de deficit entà 2013 imposat en Catalonha e se revise tà naut, de 0,7% deth PIB a 1,5%. Eth rapòrt sus finances publiques ena union economica e monetària, aprovat tanben damb es vòtes deth PP e deth PSOE, defen qu’era carga der ajustament e se deu repartir de manèra justa entre totes es administracions, en tot tier en compde es servicis que presten as ciutadans. E avertís que quan ua region se finance solament damb transferéncies deth govèrn estatau e ei mès malaisit que pogue assanir es sòns compdes en tot ajustar era despensa as ingrèssi.
 
Es eurodeputats qu’an tanben votat en favor qu’er Estat e redusisque era despensa militara e, concrètaments, ena crompa de nau armament. “Hem ua crida as estats membres qu’an problèmes budgetaris a priorizar era consolidacion fiscau en tot redusir era despensa militara innecessària, coma era crompa d’equipaments militars naui e cars”, ce reclame eth rapòrt d’Alfredo Pallone, deth Pòble dera Libertat de Berlusconi.
 
Era Eurocramba qu’exigís tanben que “s’apliquen critèris de còst-benefici as projèctes d’infrastructura qu’an un pes budgetari significatiu”, entà assegurar “era sostenibilitat des finances publiques a miei e long termini”. Alavetz eth rapòrt ce que vò qu’ei priorizar era construccion d’infrastructures qu’an un retorn economic clar, coma eth corredor ferroviari mediterranèu, en lòc dera trauèssa transpirinenca que PP e PSOE encara defenen en Brusselles, e deth modèl d’Espanha radiau.
 
 
 
 
ACN/V