Los australians son arribats al cap de lor campionat. En Euròpa, es un pauc mai complicat amb un cèrt nombre de partidas anulladas e reprogramadas (o pas). Los Dragons se trapan ara amb 3 partidas de retard. Al país, lo campionat d’Elèit-1 deuriá (d’aquesta passa, cal saupre manejar lo condicional!) començar aquesta dimenjada, alara que las autras competicions se deurián arrestar en venent tot just de començar!

Rugbi de XIII: una rega de mai al palmarés de Melbourne
 
Los australians son arribats al cap de lor campionat. En Euròpa, es un pauc mai complicat amb un cèrt nombre de partidas anulladas e reprogramadas (o pas). Los Dragons se trapan ara amb 3 partidas de retard. Al país, lo campionat d’Elèit 1 deuriá (d’aquesta passa, cal saupre manejar lo condicional!) començar aquesta dimenjada, alara que las autras competicions se deurián arrestar en venent tot just de començar!
 
 
NRL: las Pantèras assucadas se revelhan tròp tard.
 
La finala de l’NRL se debanava a Sydney, amb los 40 000 espectators autorizats. Opausava lo primièr de la sason regulara, Penrith (18 victòrias, un nul e una desfaita), al segond Melbourne, un acostumat del rendètz-vos ultim (la quatrena finala en 5 ans).
 
La Tempèsta fasiá la diferéncia dins lo primièr temps:
 
— Tresena minuta: lo centre de las Pantèras tusta al pè dins la palma e lo braç de Justin Olam qu’anava marcar. Ensag de penalitat entre los pals: 6-0.
 
— L’inusable Cameron Smith sanciona amb doas penalitats las fautas de la defensa advèrsa.
 
— A la mièja ora de jòc, l’alièr fijian de Melbourne Vunivalu intercèpta dins sos 30 mètres una passa mal assegurada del dobertura de las Pantèras que lo tornaràn trapar 70 mètres mai luènh a cabussar dins l’en-but per l’ensag.
 
— A 5 segondas de la fin del primièr temps, un jogaire de Penrith ensaja de faire sautar la palma de las mans de Cameron Smith que la recupèra, marca entre los pals e ajusta la transformacion: 22-0 per Melbourne a la pausa.
 
A la represa, sus sortida de mesclanha, l’arrièr violet Ryan Papenhuyzen (que serà designat òme de la partida) pren lo trauc e va marcar. Melbourne mena 26-0.
 
Penrith trapa enfin sas marcas e va encadenar 3 ensages per tornar a 26-16 . Melbourne mestreja pas mai la partida e dos jogaires prenon un jaune. Nathan Cleary (designat melhor jogaire de la sason pels jogaires) marca a qualques segondas del tèrme: 26-20 per Melbourne.
 
Las Pantèras temptan pas la transformacion qu’auriá fait restontir la còrna finala. Lor i demòra l’espèr magrostin (e fòl) de recuperar la palma sul còp de pè de remandadís, de marcar l’ensag sus la primièra ataca, de passar la transformacion per arrancar lo dreit a la prolongacion. Mas aprèp qualques passas desesperadas, lo balon es représ per Melbourne. Es acabat, la messa es dita: las Pantèras dominèron la sason, mas pas la finala; la formacion es jove: se la deuriá tornar trapar al mai naut nivèl dins las annadas venentas.
 
La sason es pas acabada en Austràlia: demòran de jogar las 3 partidas dels Estats d’Origina (entre Queensland e Nòva Galas) los dimècres 4, 11 e 18 de novembre. Una partida Estats d’Origina femenina se jogarà tanben lo divendres 13 de novembre.
 
En dobertura de la finala NRL, la formacion de Brisbane emportèt lo titre feminin contra las Poletas de Sydney: 20-10.
 
 
Superliga: los Dragons a l’arrèst
 
De jogaires dels Dragons son positius a la covid. Consequéncia: las partidas contra Hull FC de dijòus e contra Warrington d’aqueste diluns son reportadas; de mai, los Dragons deuràn ara téner compte del cobrifuòc e veson lo nombre d’espectators autorizats redusit de 5000 a 1000.
 
Los dragons ne son a 12 partidas jogadas e ne devon encara disputar al mens tres per poder èsser preses en compte dins un classament ont son a jogar la qualificacion per las pelhòfas.
 
St Helens a agut la bona idèa de batre 40-8 Leeds, concurrent dels catalans per la qualificacion. Wigan cartona contra Salford: 58-12. Wakefield s’impausa a Huddersfield: 18-14 e Castleford bat Hull KR: 38-24.
 
Dempuèi la debuta de la competicion jol format Superliga en 1996, la finala se ten a Old Trafford (Manchester). Serà pas lo cas per la finala a pòrtas barradas que se debanarà lo divendres 27 de novembre en serada dins l’estadi d’Hull FC.
 
 
Elèit 1: la represa?
 
A priòri, las formacions d’Elèit 1 son autorizadas a jogar. Alara, en prenent coma ipotèsi que tot se passarà plan, veirem aquesta dimenjada las partidas entre Carcassona e Albi; Avinhon e Lesinhan; Vilanòva-Palau; Catalans-Limós; lo dèrbi Tolosa-Sent-Gaudenç.
 
 
Las catalanas las mai fòrtas a 9
 
Per dobrir la sason femenina, un campionat a 9 se debanèt suls estadis de Toluges e de Cànoes lo dimenge 18 d’octòbre amb la participacion de 10 formacions d’Elèit e de 6 en federala. En Elèit, victòria de las Divessas Catalanas contra l’Escura: 12-4. Finala del tot en tot catalana en federala amb la victòria de las jogairas del Barcarés fàcia a Baó: 11-6. E ara, plaça al campionat a 13 jogairas!
 
Aqueste diluns, aprenèm lo desplaçament dels Dragons a Salfòrd fixat al diluns 2 de novembre (16 h).

 
 
Alan Roch