La NASA ven de nos assabentar que sus la Luna i a d’aiga. Aquela conclusion l’an tirada après estudiar pendent dos ans los imatges que prenguèt lo 31 d’agost de 2018 un telescòpi plaçat sus un Boeing 747 nomenat Sofia.
 
Sofia prenguèt d’imatges d’un cratèr dich Clavius, de mai de 200 quilomètres de diamètre près del pòl sud de nòstre satellit. D’observacions precedentas avián detectat qualque forma d’idrogèn sus la Luna, mas avián pas pogut destriar entre l’aiga (H₂O) e l’idroxil (OH).
 
Los responsables de la descobèrta, jos la direccion de Casey Honniball, planetològa de l’Universitat d’Hawaii e cercaira de la NASA, soslinhan que l’abondància d’aiga dins lo cratèr Clavius es d’environ 200 microgramas per cada grama de tèrra lunara. Es, doncas, una quantitat reducha, compte tengut del fach qu’un micrograma es 0,000001 grama. Coma comparason, lo desèrt de Sahara ten cent còps la quantitat d’aiga que la detectèt Sofia dins la tèrra lunara.
 
Ça que la, en despièch de las petitas quantitats, la descobèrta pausa la question sus cossí se crèa l’aiga e cossí persistís sus Luna sens aire. L’aiga es una ressorsa preciosa dins l’espaci prigond e un ingredient clau de la vida tala coma la coneissèm.
 
“Sabèm pas encara se la poirem utilizar coma ressorsa, mas saber que i a d’aiga sus la Luna es quicòm de fondamental per nòstres plans d’exploracion”, çò a dich Jim Bridenstine, actual administrator de la NASA.
 
 

We detected water on the sunlit lunar surface!

Understanding the Moon’s water helps piece together the history of water in the inner solar system and also supports future human space exploration.

Details: https://t.co/sONYzaylcopic.twitter.com/37hs7AaubP

— SOFIAtelescope (@SOFIAtelescope) October 26, 2020