Quatre activistas ucraïnesas del movement feminista Femen se desabilhèron dimenge passat dins la Plaça Sant Pèire del Vatican, quand lo papa Beneset XVI pregava l’angèlus dempuèi la fenèstra de son abitança. Es aital qu’exprimissián lo sosten als dreches dels omosexuals de se poder maridar e d’adoptar d’enfants, e criticavan la posicion de la glèisa francesa que s’opausa al projècte de lei del govèrn d’Ayraut (amb lo sosten del president Hollande) de regular aqueles dreches. L’accion causèt de moments de fòrta tension amb los carabinièrs que i aviá dins la plaça.

En aprofechant que Beneset XVI sortissiá a la fenèstra per començar de pregar, las quatre activistas se desvestiguèron; sus lors còrses, avián escrich en anglés “In gay we trust” (“Cresèm als gais”). Qualques minutas puèi, foguèron arrestadas per la polícia.
 
Aquel incident coïncidissiá amb la manifestacion que se debanèt a París contra lo projècte de lei del govèrn francés de legalizacion dels matrimònis omosexuals e de lor drech d’adoptar.
 
En novembre de 2011, cinc activistas de Femen assagèron ja de manifestar totas nudas dins la Plaça Sant Pèire del Vatican, mas foguèron interceptadas abans qu’o poguèsson far.
 
Aquel grop a ja fach d’actes semblables dins qualques païses, coma Russia, lo Reialme Unit e quitament en Ucraïna, en coïncidissent amb la darrièra Eurocopa de fotbòl.