Lo Ministèri parisenc dels Espòrts reconeis lo campionat d’Elèit 1 coma una competicion de naut nivèl: doncas las partidas se pòdon jogar dins lo respècte bèl de las règlas sanitàrias: estadis de las pòrtas barradas, referents covid, tèstes covid cada setmana pels jogaires, pas mai de 6 jogaires a l’encòp jos la docha… Las autras competicions de XIII son a l’arrèst.
 
 
Elèit 1: 3 partidas per la debuta del campionat
 
Enfin, lo tot es qu’aquesta dimenjada lo campionat podiá reprene. Mas lo virus se convidèt al rendètz-vos e las partidas Avinhon-Lesinhan e Vilanòva-Palau se poguèron pas jogar. Demoravan tres rescontres al programa.
 
Dissabte, en debuta de vèspre, Limós recebiá los Dragonets. Lo primièr temps foguèt equilibrat, puèi los Blanquetièrs, qu’avián perdut d’entrada lor capitani Herold nafrat, prenguèron lo pas suls Dragonets per ganhar 22-12.
 
Puèi, a la Pepinièra, jos un lum digne de la Pro-D2 (çò que fa qu’amb la luminositat impausada per la federacion dels XV s’i vei mai clar qu’a la raja del solelh al mes d’agost: demandatz a l’arrièr d’Albi perdut jos las candelas – e òc, de candelas coma se n’i aviá pas pro de l’electricitat! ), Carcassona recebiá los Tigres albigeses. La maquina locala botèt un moment a se metre en marcha, en manca de referéncia (pas de partida amicala jogada) e amb la preséncia del jove tres-quarts anglés Rob Storey e de l’internacional irlandés Anthony Mullaly, just arribats dins la setmana. Mas los Canaris trapèron lo bon ritme, una alternància entre un jòc alargat e d’acceleracions al ras dels tenguts, amb lo dobertura Clamenç Herrero de retorn aprèp un temps d’exili a Palau a la manòbra, per plantar 6 ensages e véncer largament: 37-4.
 
Dimenge, als Minims, Tolosa Olimpic recebiá los vesins de Sent Gaudenç. Los Orses menèron 24-10, puèi s’endormiguèron: mercé a un melhor final, los locals ganhan 26-24.
 
Vos balhi pas lo programa de la dimenjada qu’arriba, que serà complicat fins al darrièr moment de saupre la tenguda o non dels rescontres.
 
Los estadis “pòrtas barradas” fan l’afar dels rets socials: Limós difusèt sa partida sus Vòstre-Tudèl e Tolosa sus Morre de Boc. Carcassona beneficiava d’una dobla difusion: la cadena de television Via-Occitània e lo sit Morre-de-Boc del club.
 
 
Los Estats d’Origina vistalhan Austràlia
 
Un còp lo campionat NRL acabat, la sason australiana se va clavar amb lo debanament dels 3 rescontres dels Estats d’Origina entre los Blaus de Nòva Galas del Sud e los Marrons de Queensland. De costuma, los afrontaments se tenon fin de junh-debuta de julh. Ongan, son programats en fin de sason pels tres dimècres que venon: 4, 11 e 18 (de seguir sul còp de 10 oras del matin sus BeInSport).
 
Perseguissent una volontat de desvolopament, los responsables tretzistas an decidit d’anar faire òbra de propaganda per la primièra partida del costat d’Adelaïda, abans de mudar mai classicament a Sydney per l'11 e a Brisbane pel 18 de novembre.
 
 
Una Superliga evolutiva
 
Entre las mesuras sanitàrias en Anglatèrra e en França, las necessitats e las difusions TV, las formacions pertocadas per la covid, las partidas remesas, desprogramadas e reprogramadas, se pòt pas dire que lo debanament de la Superliga siá ongan un long flume tranquil. En aquesta debuta de setmana, se causirà la formula definitiva que menarà a las pelhòfas e a la finala a Hull lo 27 de novembre.
 
Los Dragons Catalans, privats de partida contra Hull FC lo 22 d’octòbre e contra Warrington lo 26, an, en principi, doas partidas al programa d’aquesta setmana: desplaçament a Salford aqueste diluns 2 e recepcion de St Helens a Brutus dijòus 5.

E aqueste diluns, crudèla desillusion del costat de Salford pels Dragons que menavan 18-6 a la pausa e que foguèron inexistents a la represa en encaissant 6 ensages en seguida (l’ancian Dragon Inu ne planta 3!) per pèrdre 42-24. E Saint Helens serà tre dijòus a Brutus.
 
La situacion es pièger per Toronto que la Superliga refusa son inscripcion a la competicion venenta.

 
 
 
Alan Roch