La nominacion de Nanaia Mahuta coma ministra dels afars exteriors de la Nòva Zelanda es un eveniment istoric car se tracta de la primièra femna maòri qu’assumís la direccion de la diplomacia neozelandesa. A mai, lo Partit Verd tendrà dos ministèris e mai los trabalhistas de Jacinda Ardern obtenguèsson la majoritat absoluda a las eleccions legislativas del 17 d’octòbre.
 
Las prioritats del nòu govèrn son lo recobrament economic del país après la pandemia de la covid-19 e lo refortiment del sistèma de santat per contunhar de combatre la nòva malautiá, çò a dich Ardern dins una conferéncia de premsa.
 
La primièra ministra defend lo maòri. Fa dos ans, diguèt publicament a la television maòri del país que sa filha creisseriá en mestrejant las doas lengas: lo maòri e l’anglés. Segon Adern, lo maòri es una lenga oficiala que “bastís tanben nòstra compreneson per la cultura” perque, segon ela, “la lenga es lo còr de la cultura”.
 
Fa qualques ans, se crenhiá la mòrt de la lenga. Ara se reviscòla. Quitament i a de listas d’espèra per l’aprene. Ardern espèra de veire un milion de neozelandeses a parlar maòri en 2040.