Un bombardament de l’armada argeriana sul sit de gas de la localitat argeriana d’In Aminas, ont un grop de quinze jihadistas aviá raubats de trabalhadors provenent de divèrses païses, a congreat una situacion de confusion absoluda. A l’ora d’ara, se sap pas encara quantes ostatges e jihadistas son mòrts. Un grop restacat a Al Qaida del Magrèb Islamic (AQMI) raubèt ièr 41 ciutadans estrangièrs e 150 trabalhadors argerians e los retenguèt dins las installacions del sit, en represalhas contra l’intervencion militara francesa en Mali.

Un pòrtavotz dels raubaires, que manten un contacte dirècte amb l’agéncia mauritana d’informacions ANI, a avertit que los sequestrators executarián los ostatges qu’aurián subreviscut se l’armada contunhava de se sarrar d’eles.
 
 
Cameron a plangut qu’Argeria aja pas consultat Londres abans d’atacar
 
Lo primièr ministre britanic, David Cameron, a plangut qu’Argeria aja pas consultat la comunautat internacionala abans d’atacar. Un pòrtavotz del primièr ministre a explicat que Cameron a parlat amb son omològ, Abd Al Malik Sallal, sus la situacion fòrça perilhosa e seriosa que se debana dins lo sit d’In Aminas. “Lo primièr ministre argerian a explicat que la situacion cambiava fòrça rapidament e que lo govèrn considerava que caliá agir immediatament”, çò a explicat lo pòrtavotz. Mas a apondut que Londres a dich qu’auriá preferit èsser consultat abans l’intervencion.
 
Lo departament de la comunicacion del govèrn britanic a confirmat, tanben, que França, lo Reialme Unit e los Estats Units an mantengut de convèrsas sus la situacion en Argeria. A travèrs d’una fiulada sus Twitter, Downing Street a assegurat que Cameron a parlat amb lo president francés, François Hollande, e amb l’estatsunidenc, Barack Obama.
 
A Washington, l’Ostal Blanc a assegurat qu’es a cercar d’informacions sus çò que se passa dins lo sit de gas d’Argeria. Segon Reuters, lo govèrn dels Estats Units pòt pas confirmar qui son los responsables del raubatòri, ni lo nombre de victimas.
 
Del sieu costat, la companhiá petrolièra BP, qu’esplecha l’usina amb la norvegiana Statoil e l’argeriana Sonatrach, a emés un comunicat ont assegura qu’a pas cap d’informacion sus çò que se passa dins lo sit. “La situacion contunha d’èsser pauc clara, e sèm encara a esperar d’actualitats de las autoritats”, çò a dich BP. “Malaürosament, i a d’informacions sus de victimas mortalas, mas avèm pas encara cap d’informacion de confirmada. I a tanben d’informacions sus d’ostatges que son estats liberats o qu’an fugit”, çò ditz lo tèxt.
 
L’entrepresa norvegiana Statoil a confirmat qu’aviá 12 trabalhadors norvegians dins lo sit al moment del raubatòri, mas que sap pas qual es lor situacion exacta. “Norvègia a una còla importanta de gents que son a trabalhar durament per establir los faches”, çò a indicat un pòrtavotz del ministèri de l’Exterior norvegian.
 
Un òme irlandés es estat liberat e se pòrta plan, segon çò qu’a confirmat lo ministèri de l’Exterior irlandés.
 
D’informacions provenent de l’agéncia de Mauritània dison que l’atac contra lo sit de gas poiriá aver provocat aperaquí la mòrt de 35 ostatges e de 15 raubaires, ça que la, i a pas cap de confirmacion oficiala. L’agéncia d’informacions argeriana a dich qu’“aperaquí 600 trabalhadors argerians” son estats liberats.