L’intervencion del president Donald Trump divendres passat de l’Ostal Blanc estant, ont declarava que i aviá agut de frauda electorala e que los democratas ensajavan de ganhar l’eleccion, a causat tant d’estonament que los presentators de qualques cadenas de television màgers copèron la compareissença en dirècte per avertir que disiá de messorgas. Es lo cas del jornalista Shepard Smith, de la CNBC, qu’a mièg discors de Trump diguèt: “O interrompèm, perque çò que ditz lo president dels Estats Units, en bona part, es pas vertat. A començat e permetrem pas que contunhe perque es pas vertat. A començat de dire que i aviá de vòtes legals e que se se comptava solament los vòtes legals el ganhariá aisidament e qu’amb los illegals ensajavan de ganhar las eleccions. I a pas cap d’evidéncia qu’aquò siá vertat. Cap. Son solament de paraulas. Es pas vertat”.
 
Puèi, Smith enumerèt qualques afirmacions falsas que Trump aviá fachas dins son discors. “A dich que i aviá agut una interferéncia dins las eleccions. I a pas cap de pròva qu’o demòstre, e lo president n’a pas portat cap. Ditz que los sondatges foguèron falses. En qualques cases los sondatges faguèron de confusions. S’es comentat fòrça que benlèu lo concèpte dels sondatges se deviá repensar. Aquò es una autra causa. I a pas cap de pròva que los sondatges sián falsificats”.
 
Mai encara: “A dich que s’èra pas permés als observaires d’intrar dins los burèus de vòte per contrarotlar lo comptatge dels vòtes. Es categoricament fals. Dins totes los cases los observaires an pogut seguir lo comptatge”.
 
Sus l’acusacion de Trump que i a un ensag de cometre una frauda electorala: “Es categoricament fals. Dins l’estat de Georgia an demandat al secretari d’estat s’i aviá cap d’enquista per frauda. E lo secretari d’estat de Georgia a dich que i aviá pas cap de denóncia sus frauda electorala de part de democratas ni de republicans. E i a pas cap d’enquista. La vertat es que lo comptatge contunha”.
 

President Trump just spoke at the White House, as key states continue to count votes.
Shep has the facts: “What the President of the United States is saying, in large part, is absolutely untrue.” #Election2020https://t.co/E6DBt6OodDpic.twitter.com/HVa87qUCzB

— The News with Shepard Smith (@thenewsoncnbc) November 6, 2020

 
Un autre exemple es lo dels jornalistas de l’ABC News David Morissi e Jonathan Karl, qu’après lo discors an desmentit las afirmacions de Trump: “I a pas cap de pròva que i aja agut de vòtes illegals”.
 

.@DavidMuir and @jonkarl on Pres. Trump's baseless claims: "There is simply no evidence that has been presented in any of these states that there are illegal votes." https://t.co/GwwRl4Wv2B#Election2020pic.twitter.com/6GDqFrEuuQ

— ABC News (@ABC) November 6, 2020

 
Quitament la cadena Fox a mes en question las afirmacions de Trump: “I a pas cap de pròva de çò que ditz lo president”:
 

Fox News says Trump has no proof or evidence to back up his fraud allegations and notes that Trump’s margin in Georgia has now shrunk to 3,600 votes. pic.twitter.com/98HtMQvfhf

— Keith Boykin (@keithboykin) November 6, 2020