Dimècres passat, lo Parlament Europèu (PE) aculhiguèt la primièra reünion de l’intergrop sus la viticultura après qu’òm li liurèsse, lo 14 de decembre passat, lo document de conclusions realizadas pel grop de reflexion de naut nivèl sus los dreches de plantacion. Los eurodeputats de l’intergrop an avalorat positivament la volontat de la Comission Europèa (CE) de manténer un cèrt nivèl de regulacion suls dreches de plantacion, mas an exprimit qualques chepics.

Dins aquel sens, Catherine Grèze, eurodeputada d’Euròpa Ecologia-Los Verds (EELV), elegida dins la circonscripcion occitana del “Sud-Oèst”, sosten que cal far atencion, pendent tot lo procès qu’arribarà, a una reforma de la politica agricòla comuna (PAC) que se menarà a tèrme al mes de març. Concretament, la representanta ecologista demanda que los cambiaments intren pas en vigor abans l’an 2019 per fin de “donar de temps als vinhairons per s’organizar”; e reclama tanben que las mesuras agricòlas ajan un caractèr “durable”. L’intrada en vigor del nòu sistèma dels dreches de plantacion es un dels cavals de batalha pr’amor que poiriá començar de s’aplicar, segon l’esbòs inicial, en 2016.
 
Cal dire que lo projècte, al delà de tot aquò, respond fòrça a las demandas del sector agricòla. Las mesuras s’aplicaràn dins totes los Estats membres de l’Union Europèa (UE), tocaràn totas las varietats de vin, e se menaràn a tèrme sus la basa de critèris objectius e non discriminatòris. Es important de soslinhar que las autorizacions de plantacion seràn gratuitas —aital o demandava lo sector— e que lo projècte aurà una durada prevista de solament sièis ans, un fach que Grèze considèra escàs se prenèm en compte la durada dels cicles agraris.