Totes los mèdias n’an parlat a bèl bodre: Joe Biden serà lo novèl president dels Estats Units, mas la nòva que nos tira mai l’atencion es qui serà sa primièra vicepresidenta.
 
A 78 ans lo 20 de novembre, Biden serà lo president pus vièlh  de l’istòria dels Estats Units a èsser investit, e fòrça opausants an soslinhat que son estat de santat fisica e mentala èra pas idonèu per afrontar la frenesia que l’exigís la presidéncia dels Estats Units. Segon lo rapòrt publicat per son mètge, Biden es en plan bona santat, mas sos frequents lapsus e confusions an fach virar de rumors e de criticas.
 
Es per tot aquò que Biden causiguèt la senatritz de Califòrnia Kamala Harris coma candidata a la vicepresidéncia e mai foguèsse una anciana rivala de Biden dins las primàrias. Fòrça analistas o interprètan coma un movement per assegurar son successor davant lo Partit Democrata e tanben davant lo país. Los analistas estatsunidencs son segurs que Biden serà pas candidat a la reeleccion en 2024, ont auriá ja 82 ans, e doncas lo vicepresident a totjorn un avantatge dins las primàrias del partit. De fach, s’especula quitament que, a mièg mandat, Biden pòsca cedir sa plaça a Harris, que vendriá aital la primièra femna presidenta dels Estats Units.
 
Kamala Harris es mai o mens progressista e antiracista. Son eleccion compensa lo perfil moderat de Biden, que los electors percebon coma fòrça conservator. Nascuda en 1964, filha d’immigrants d’Índia e Jamaica, Harris ven la primièra femna afroamericana e tanben asiaticoamericana a aver fach partida d’una candidatura a l’eleccion presidenciala estatsunidenca. Serà tanben la primièra femna vicepresidenta. Aquò s’èra pas jamai fach fins ara.
 
Harris foguèt procuraira del districte de San Francisco de 2004 a 2019 e procuraira generala de Califòrnia de 2011 a 2017. En 2016, foguèt elegida senatritz dels Estats Units, la tresena femna senatritz de l’istòria d’aquela cambra e la primièra a èsser pas descendenta de colons europèus. Lo 21 de genièr de 2019, anoncièt oficialament sa candidatura a la presidéncia dels Estats Units per l’eleccion de 2020. Sa candidatura s’interrompèt en decembre car aviá obtengut plan pauques vòtes. Pasmens, aguèt temps d’afrontar precisament Joe Biden, per la feblesa d’aqueste contra lo racisme dins lo passat.


 

Kamala Harris spoke to the American people following Joe Biden's win over Donald Trump. Harris will be the first woman, the first Black American and the first American of Asian descent to serve as vice president https://t.co/wiFfwhtZCApic.twitter.com/HDNXoZi9LF

— Reuters (@Reuters) November 8, 2020