Lo calendièr de la fasa de classament de la Superliga deveniá impossible a téner: Castleford pertocat per la covid, St Helens que voliá pas venir jogar en Catalonha… Fin finala, los dirigents angleses decidiguèron en debuta de setmana passada de suspendre la competicion e de passar dirèctament a de pelhòfas jogadas pels primièrs 6: las formacions qu’avián mai de victòrias que de desfaitas, qu’agèsson jogat 17 partidas o solament 13 coma los Dragons.

Pasmens, doas darrièras partidas de classament se disputèron: dijòus, Salford anèt ganhar a Wakefield 28-20; divendres, mercé a la victòria 19-6 fàcia als Gigants, Wigan acaba aquesta fasa a la primièra plaça.
 
Los dos caps de fila, Wigan e St Helens, son dirèctament qualificats per las mièjas finalas. En barratge, Warrington reçauprà Hull FC dijòus e los catalans (4ns) aniràn divendres disputar la partida qualificativa contra Leeds (5n) sus la meteissa pelena dels Lops de Warrington. L’entraïnaire McNamara ten de trabalh per mobilizar una formacion que la constància sus la durada d’una partida foguèt pas plan sovent al rendètz-vos, coma o mòstra la desfaita patida a Salford.
 
Autra decision: Toronto serà pas marcat en Superliga per 2021: l’arrèst d’un somi d’espandiment cap a Canadà? Lo projècte d’Ottawa en League 1 per 2021, ont Laurenç Fraissinós deviá entraïnar la formacion, tomba a l’aiga: benlèu per 2022 o per jamai?
 
Per l’ora, crida a candidatura es lançada per la 12a plaça de la competicion màger: lo Tolosa Olimpic presenta sa candidatura, mas Featherstone, Leigh, York, Halifax o Londres somian tanben d’aquesta montada sul tapís verd.
 
 
Una jove formacion de Queensland bat los Blaus
 
Dimècres passat 4 de novembre, lo primièr rendètz-vos dels Estats d’Origina se debanava dins l’estadi oval d’Adelaïda, mai acostumat a las partidas de criquet o de fotbòl australian.
 
Wayne Bennet, novèl responsable de Queensland, aviá lançat una operacion renovelament amb 8 jogaires jamai seleccionats. Consequéncia: los Blaus de Nòva Galas de Sud partissián favorits.
 
E los Blaus se mostrèron mai realistas dins lo primièr temps per marcar dos ensages e menar 10-0 a la pausa. Dins lo segond temps, las moscas cambièron d’ase (o de cangoró?) e los joves Violets profeitèron de qualques paumas perdudas per anar tres còps en dama. Cherry-Evans ensaca las 3 transformacions. Lo segond ensag de l’alièr Josh Addo-Carr (75a) permetrà pas als Blaus de capvirar lo sòrt de la partida dins las darrièras minutas. Victòria doncas de Queensland: 18-14, abans un novèl rendètz-vos aqueste dimècres 11 del costat de Sydney.


Un rescontre internacional!
 
Lo programa 2020 mondial de XIII vegèt se debanar aqueste dissabte lo sol rescontre internacional de l’an. A Auckland, una jove formacion amb 11 jogairas novèlas de Nòva Zelanda afrontava las samoanas. Las dònas del malhòt negre ganhèron 24-4.
 
 
Elèit 1: cal pas vendre lo plumatge del Canari…
 
Tres partidas d’Elèit 1 se debanèron dissabte. Jos la pluèja, Vilanòva ganhèt contra Lesinhan: 25-14. A Albi, los locals pleguèron fàcia a Avinhon 31-24 que tenguèt còp malgrat un moment a l’ora de jòc a onze sus la pelena, en rason de dos cartons jaunes. A Sant Estève, calguèt de temps als Dragonets per mestrejar la formacion tolosana: 30-18.
 
Dimenge, espantanta victòria de Carcassona a Sent Gaudenç que remplaçan la formula “cal pas vendre la pèl de l’ors…» per “cal pas vendre lo plumatge del canari abans de l’aver plumat”. Menats 32-12 a mens d’un quart d’ora de la fin, los Jaune e Negre se lança dins una remontada e plantan quatre ensages, lo darrièr quasiment sus la còrna, e ne transforman 3 per véncer 34-32: St Gaudenç aviá tanben perdut sus la fin dimenge passat a Tolosa!
 
D’aquel temps a Palau, Limós s’impausa 40-20 dins una partida a l’anciana, ont l’arbitre sortiguèt mai d’un còp lo carton jaune (exclusions de 10 minutas).
 
 
 
Alan Roch