La cooperativa carcinòla Railcoop relança la linha ferroviària entre Bordèu e Lion, que l’aviá abandonada l’SNCF. Espelida arunan per concebre de servicis ferroviaris adaptats als territòris, Railcoop prepausa tres trens per jorn qu’uniràn Bordèu e Lion en 6h47 minutas en passant per Liborna, Peireguers, Lemòtges, Sent Superis, Garait, Montluçon, Gatnat, Sant German daus Fossats e Roana.
 
Railcoop lança aquela linha après constatar que “lo mercat província-província en tren classic rèsta largament inesplechat”, coma a ben dich son president, Dominique Guerrée. De son caire, lo director general, Nicolas Debaisieux, precisa qu’amb aquesta primièra societat cooperativa d’interès collectiu de França dedicada al ferroviari, volèm facilitar l’implicacion dels ciutadans dins lo tren”.
 
E mai lo trajècte en veitura siá pus cort, Railcoop compensa los viatjaires amb un viatge mai confortable plen de servicis a bòrd coma un airal de jòcs pels enfants, de restauracion e un luòc per gardar las bicicletas, los esquís o las planchas de surf.
 
Per mai d’informacions sus aquesta iniciativa, recomandam la tribuna de Jean-Charles Valadier d’aqueste dimècres passat: «Non se fisar de París per faire circular de trens en Auvèrnhe e Lemosin».
 


Google Maps