Contunhan las tragèdias de migrants e refugiats en mar Mediterranèa e ocean Atlantic.
 
En Atlantic, aquesta setmana son mòrts negats 480 joves senegaleses negats. Ensajavan d’arribar en piròga a las illas Canàrias. Los qu’an agut l’astre d’i arribar se tròban amolonats dins un petit espaci sus un cai del pòrt d’Arguineguín, dins l’illa de la Granda Canària. Las autoritats e las organizacions umanitàrias fan una crida desesperada per gerir las nombrosas arribadas e denóncian las marridas condicions dins las qualas se tròban.
 
A mai, Amnestia Internacionala a denonciat que se dona d’òrdres de remandament sens ofrir “cap d’assisténcia juridica”, çò que per l’organizacion es una “grèva violacion del drech internacional”. Tanben Human Rights Watch a denonciat las condicions del campament d’Arguineguín: “Respèctan pas la dignitat de las personas ni lors dreches fondamentals”. HRW remarca que i a de mond que son dempuèi 12 jorns sens cap de traductor ni avocat.
 
Los jornalistas planhon que se lor permeta pas de prene d’imatges del sit.
 
 
Mentretant en Mediterranèa
 
Mentretant en Mediterranèa contunhan d’èsser nombroses los que fugisson Líbia, un país amb una situacion de guèrra civila e amb dos govèrns que s’autoproclaman legitims.
 
L’Organizacion Internacionala de las Migracions (OIM) a raportat la mòrt de 13 personas dimars passat, que degun poguèt pas salvar. Demest aquelas mòrts i auriá tres femnas e un menor.
 
Dimècres, ne moriguèron almens sièis, sus un centenat de personas qu’anavan dins una embarcacion de fortuna. Qualques oras après qu’aguèron naufragat, los localizèt e salvèt l’organizacion umanitària Open Arms. Se capitèt a salvar la vida de la majoritat dels migrants, especialament de totes los enfants, franc d’un nenet de 6 meses.
 
Durant aquesta setmana, Open Arms a socorregut 88 personas en Mediterranèa centrala. Dempuèi lo 4 de novembre, aquela organizacion a fach 78 missions de salvament.
 
Mentre que s’escriu aqueste article, lo vaissèl d’Open Arms transpòrta 263 personas salvadas a bòrd e 6 cadavres, e se tròba près de l’illa de la Lampedosa.