Après la mòrt del petit Aylan Kurdi ara fa cinc ans, lo decès d’un autre enfanton ven de metre un nom e d’umanizar la tragèdia dels migrants. Se nomenava Joseph, aviá sièis meses e los imatges del desespèr de sa maire venon de virar pel Mond.
 
Raportàvem ièr las darrièras tragèdias umanitàrias dels migrants que fugisson en traversant la mar, mièg milièr de mòrts senegaleses en Atlantic qu’ensajavan d’arribar a las Illas Canàrias e almens sièis personas en Mediterranèa. L’embarcacion de fortuna que transportava 111 migrants aguèt l’astre d’èsser localizada per la còla de l’organizacion umanitària Open Arms qu’arribèt de salvar la vida de gaireben totòm franc del petit Joseph.
 
La còla de l’Open Arms a publicat sus Twitter un vidèo que mòstra la destresa de la maire del paure Joseph. “Escotatz lo son del naufragi que visquèrem ièr. Lo crit desesperat d’una aire a la recèrca de son nenet de sièis meses, dins lo caos. Lo recuperèrem de la mar en arrèst respiratòri, aquò capitèt plan, mas qualques oras puèi son petit còrs resistiguèt pas pus. Ela es la maire de Joseph”, çò escriguèt l’organizacion sus Twitter.
 
Aquel imatge a virat pel Mond e a permés de donar un nom e una istòria umana a una tragèdia que se passa dempuèi mai de dètz ans sens cap de solucion. A mai, aquela istòria demòstra que malgrat lo risc de mòrt, la mar es mai segura que demorar sus la tèrra, coma o remembra Mireia Boya dins un article d’opinion publicat dins El Món.
 
 
 

Escuchad el sonido del naufragio que vivimos ayer.
El grito desesperado de una madre en busca de su bebé de 6 meses de vida, en medio del caos.
Le recuperamos del mar en parada respiratoria,remontó, pero horas más tarde su pequeño cuerpo no resistió.
Ella es la madre de Joseph pic.twitter.com/mYzXLq1jxi

— Open Arms (@openarms_fund) November 12, 2020