capçalera campanha

Actualitats

InternacionalPoliticaSocietat

La Republica Aràbia Saharauí Democratica es tornarmai intrada en guèrra amb Marròc

Lo president de la RAAD, Brahim Gali, a anonciat que desenant las fòrças armadas saharauís assumissián lo contraròtle de la seguretat nacionala

Lo president de la Republica Aràbia Saharauí Democratica (RASD), Brahim Gali, considèra que Marròc a romput l’alta al fuòc de 1991 e en consequéncia a declarat l’estat de guèrra, après los darrièrs movements de l’armada ocupanta de Marròc, que s’es desplegada a l’extrèm sud de la RASD, concretament a Al Guargarat, per rompre lo blocatge del transit que dempuèi tres setmanas realizavan de manifestants saharauís e del Front Polisario.
 
Gali, qu’es tanben lo secretari general del Front Polisario, a declarat que desenant las fòrças saharauís assumissián lo contraròtle de la seguretat nacionala. Lo decret ordena tanben a l’Autoritat de la Seguretat Nacionala que prenga las mesuras de gestion e administracion de las institucions per garentir la regularitat dels servicis a la populacion. Demest aquelas disposicions, s’es establit un cobrifuòc als campaments de refugiats.
 
A mai, lo Front Polisario afirma qu’a causat a l’armada marroquina de pèrdas umanas e de damatges materials amb quatre bombardaments sus quatre basas militaras e dos pòstes de sentinèlas.


Un referendum qu’arriba pas jamai

 
Ièr, 14 de novembre, complissián 40 ans de la partença de l’estat espanhòl dels territòris de la Republica Aràbia Saharauí Democratica. Après la partença dels espanhòls, los saharauís proclamèron la lor independéncia mas l’invasion marroquina provoquèt un conflicte qu’encara es luènh d’èsser resolgut.
 
Aquel país foguèt considerat coma una partida del territòri espanhòl de 1884 a 1976. Considerat a partir 1934 coma una província espanhòla de mai, vegèt coma la consciéncia nacionala dels sieus abitants se despertava pendent los ans 1970 del sègle XX. Foguèt en 1973 que lo grop de resisténcia Front Polisario comencèt la lucha contra los colonizaires espanhòls. Eles reconeguèron lo drech d’autodeterminacion d’aquel pòble en 1976 mas permetèron que los marroquins e los mauritans los envasiguèsson aquel meteis an.
 
L’invasion comencèt quand Marròc lancèt 300 000 civils contra las frontièras del Sahara Occidental en 1975. En aquela epòca, lo dictator espanhòl Franco èra a mand de morir e foguèt lo nòu rei Joan Carles Ir que signèt l’abandon del territòri, maldespièch los dreches dels sieus abitants.


Après l’invasion marroquina, la guèrra entre los saharians e Marròc contunhèt fins en 1991, quand l’ÒNU faguèt signar una alta al fuòc. Cinc ans puèi, en 1996, las quitas Nacions Unidas decidiguèron d’anullar lo referendum que lo demandava sa populacion. En 2001 començèt lo Plan Baker que, totun, foguèt abandonat pr’amor de las pressions marroquinas. Dos ans puèi, l’ÒNU abandonava definitivament quin que siá ensag de resòlver aquel conflicte african.
 
 
 
 



abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
1.

Lo Govern de Madrid non a fait res per exigir qu' es faga lo referendum d'autodeterminacion acordat per las Nacions Unidas. Espanha e lo sieu Govern a l'obligacion morala de demandar al Marroc qu' es faga lo Referendum. L'excolonia espanhola del Sahara que foguet invadida pel Marroc en la " Marcha verde"foguet una violacion del Dret Internacional e l'invasion del país per lo sistema impresentable de lo Marroc, son rei e son govern. Lo PSOE e PODEM an de far lo que sia per exigir qu' es faga l'acordat en l'ONU.

  • 3
  • 0

Escriu un comentari sus aqueste article