Dijòus, suspresa pel primièr torn de las pelhòfas: lo seisen, Hull FC, se va impausar sus la pelena del tresen, Warrington, 27-14 e rescontrarà aqueste dijòus Wigan per las mièjas finalas. Hull FC pòt dire mercé al cambiament del format de las fasas finalas!
 
Divendres, sus la meteissa pelena, los Dragons Catalans èran en operacion comando: partits en avion en debuta de vèspre de Perpinhan, lo car e zo! lo terren per se trapar fàcia als Rinocèros de Leeds.
 
Primièra minuta: dins los 20 mètres catalans, Sam Tomkins trauca al ras del tengut, trapa l’alièr Tom Davies a la relèva: ensag e transformacion de James Maloney: 6-0.
 
Ueitena minuta: còp de pè a ras de pelena de Sam Tomkins, lo centre Samisoni Langi punta l’ensag. Transformacion de James Maloney: 12-0.
 
Trenta dosena minuta: candela de Sam Tomkins; Israel Folau sauta mai naut que tres angleses e capita de se revirar per puntar l’ensag. Transformacion de James Maloney: 18-0.
 
Trenta setena minuta: lo menaire de jòc de Leeds, Luke Gale, bota Alex Sutcliffe dins lo trauc. Ensag transformat. 18-6 pels catalans a la pausa.
 
Represa, coma tròp sovent, complicada pels Sang e Aur qu’encaissan un ensag a la 50a minuta: 18-10. La partida s’equilibra.
 
65a minuta: David Mead rauba la palma dels braces d’un atacant anglés e va marcar sens oposicion aprèp 30 mètres de corsa. Transformacion de Maloney: 24-10 pels catalans.
 
69a minuta: Leeds jòga a la man aprèp lo cinquen tengut e Konrad Hurell marca dins lo recanton. 24-14 pels Dragons.
 
73a minuta: dels 40 mètres, James Maloney ensaca una penalitat. 26-14: serà la marca finala.
 
L’entraïnaire McNamara explica: “Crentavi lo segond temps que d’unes avián pas jogat dempuèi sièis setmanas. Seriá estat damatge de pèrdre, que la setmana que ven serem mai fòrts!”. O caldrà plan fàcia a St Helens que foguèt de temps primadièr de la competicion. Dos còps ja, los Dragons son arribats en mièja finala. Aqueste còp, cal veire mai naut e, tant qu’i sèm, al mai naut!
 

 
 
Tolosa, dins los 6 candidats per la Superliga de 2021
 
Es a la mitat de decembre que se sauprà qual es lo club convidat a prene part a la Superliga de 2021 en remplaçament de Toronto. La jurada deurà causir entre las candidaturas de Tolosa e las de Leigh Centurions, London Broncos, Featherstone Rovers, Bradford Bulls e York.
 
Per èsser candidatas, las formacions devon aver jogat en Superliga o s’èsser qualificadas per las pelhòfas de Championship en 2018 o 2019; aver un estadi de 5000 plaças; aver una mejana de 2000 espectators sus las darrièras doas sasons; se gaitarà tanben la politica de formacion, l’accessibilitat per la premsa, la preséncia suls rets socials… Los Dragons Catalans e la Federacion an fait part de lor sosten a la candidatura de la capitala occitana.
 
 
Estats d’Origina: cavalièr sol dels Blaus
 
Aqueste dimècres 11 de novembre, l’ANZ Stadium èra l’encastre de la segonda confrontacion dels Estats d’Origina. La partida agèt una fisonomia plan diferenta de la primièra ganhada 18-14 pels Violets de Queensland. Fòra l’ensag amb un cabuç espectacular de l’alièr Xavier Coates que dobriguèt la marca, lo demai del temps se vegèt una sola formacion sus la pelena: los Blaus de Nòva Galas del Sud que joguèron mai aviat, desvarièron la defensa advèrsa, marquèron 6 ensages. Menavan 18-4 a la pausa e s’impausèron fin finala: 34-10.
 
La tresena partida aqueste dimècres 18 a Brisbane serà doncas decisiva per saupre lo venceire de la tièra de 2020 dels Estats d’Origina.
 
Es mai que probable que la competicion tornarà trapar plaça al calendièr al mes de julh la sason venenta. Las partidas en fin de sason foguèron pas una capitada del punt de vista del nombre de telespectators: vertat que los Blaus semblavan los mai fòrts. Semblavan… mas cada partida ten sa vertat. Responsa definitiva de seguir dimècres de matin sul còp de 10 oras sus BeInSport (se los tecnicians de Sydney pòdon anar filmar a Brisbane!).
 
Cò de las femeninas, l’afrontament entre las doas províncias se jòga sus una sola partida. Divendres 13, al Sunshine Coast Stadium (de Kawana Waters, en Queensland), las dròllas de Queensland s’impausèron 24-18.
 
 
XIII e coronavirus
 
Dins lo Jornalet occitan de France 3 Sud d’aqueste dissabte 14 de novembre, Sirina Tijani entrevistèt dos ancians calandrons: Nicolàs Bianchini (Albi XIII) e Lucàs Albèrt (Dragons, mas que va rejónher Carcassona) per faire lo punt en lenga nòstra sul XIII fàcia al coronavirus.
 
 
Elèit 1: lo calendièr-acordeon; e de 3 per Carcassona
 
De fait, amb de clubs pertocats per la Covid, la possibilitat de reportar de partidas als 21 e 22 de novembre (jornadas previstas per la Dimenjada Magica que se pòt pas organizar) o als 28 e 29 de novembre (jornadas de ratrapatge ja marcadas), tot aquò fa que demorava una sola partida al programa de la dimenjada.
 
Dissabte, Carcassona XIII recebiá los Dragonets a Domèc. Las doas formacions prepausèron una agradiva e engatjada partida. Los Jaune e Negre faguèron la corsa en cap sens que los catalans capitèsson de los juntar: los locals dobriguèron la marca amb una penalitat de Clamenç Herrero, lo pilar irlandés Mullaly marquèt un ensag, Herrero lo trasformèt e rajustèt una penalitat, mas just abans la pausa l’arrièr vesitaire Baby puntava l’ensag que transformava: 10-6 per Carcassona.
 
A la represa, l’alièr Alexís Escamila marcava en cap de linha dins lo canton, mas lo davant Dezaria profeitava d’un còp de pè a seguir per marcar: los catalans tornavan a 2 punts (14-12). Miulaly i anèt d’un segond ensag transformat, abans un ensag de l’alièr Gambarro daissat sol dins son corredor. L’ensag de Chan a la darrièra minuta cambiava pas lo sòrt de la partida emportada pels Canaris (24-18), que signan atal lor 3a victòria de la sason.
 
 
 
 
Alan Roch