Se presenta uèi, 18 de novembre, lo videoclip de la cançon de Leis alas dau temps. Es lo primièr videoclip de l’album Pantais Clus, l’album que Rodin Kaufmann trabalha dempuèi 2014 e que se presentarà lo 10 de febrièr de 2021 gràcias a un finançament participatiu.
 
Lo videoclip de la cançon de Leis alas dau temps “es un filme cort, puslèu poetic, que mòstra un jove paire que galèra, e que va prene sa filha a l’ostau de son èx, e la mena au campèstre, en cò dei parents de son èx, lei grands de la pichòta, que bensai aviá jamai vists... e eu se pren a córrer, de mai en mai, dins la montanha, fins a se retrobar fàcia a un ors”, çò a explicat lo musician provençal a la redaccion de Jornalet. De fach, per Rodin, l’ors es “un animau fèr un pauc emblematic de la cultura occitana”.
 
Realizat per Amic Bedel, lo clip es lo primièr d’una sèria de tres, e compren —atencion!— la participacion de Max Roqueta.
 
 
Un artista pluridisciplinar
 
Rodin Kaufmann es un rapaire, productor, cantador e poèta pluridisciplinar d’expression occitana. Afogat de la musica —sustot de l’hip-hop— del dessenh e de la poesia, jonguèt lo Còr de la Plana en 2001. Devèrs 2010 comencèt de trabalhar sus de projèctes mai personals en publicant son primièr single Indignats en duo amb un rapaire de Brooklyn, e un clip rodat per Amic Bedel a Nòva York, e a montat son labèl Pantais Recòrds. En 2015 publiquèt un EP de poesia experimentala ARA qu’èra un disc collaboratiu, amb de musicaires sortits dels mitans de las musicas experimentalas, contemporanèas o improvisadas.
 
Dempuèi 2014 trabalha sus son album Pantais Clus, que poguèt fabregar en CD l’an passat gràcias a una campanha de finançament participatiu. Lo disc sortirà finalament lo 10 de febrièr de 2021 amb lo labèl estatsunidenc Fake Four, qu’es un dels mai grands labèls d’hip-hop independent dels Estats Units. Dempuèi qualques meses, fa de collaboracions amb d’artistas estatsunidencs coma An Illustrated Mess, un grop navajo d’Arizona amb lo qual ja fach 3 tròces ensems. Tanben mena de projèctes en cors amb Ceschi, e Factor Chandelier, un grand artista e patron del labèl Fake Four, e un superproductor canadenc. En mai de tot aquò, montèt l’an passat la companhiá Neblum, dedicada a las praticas poeticas non literàrias, en occitan e en catalan.
 
De legir l’entrevista de Rodin Kaufmann publicada lo 20 de setembre passat.