L’argent del fons europèu contra la crisi de la covid-19, dotat de 750 miliards d’èuros, serà pas disponible lo 1r de genièr de 2021 coma èra previst. Dins una reünion d’ambaissadors dels 27 a Brussèlas, Ongria e Polonha an mes lor vèto a un mecanisme que se deu aprovar a l’unanimitat. La rason n’es que la desparticion d’aquel argent es restacada a l’observacion de cèrtas mesuras democraticas; òr la Comission Europèa a dobèrt de proceduras d’infraccion contra los dos estats.
 
“Ongria a mes son vèto al budget, coma o aviá avertit lo primièr ministre Orbán, perque podèm pas sosténer lo plan jos sa forma actuala qu’assòcia los critèris de l’estat de drech a las decisions budgetàrias”, çò a dich lo pòrtavotz del primièr ministre ongrés, Viktor Orbán.
 
D’efièch, l’acòrdi istoric de l’UE per crear un fons europèu contra la crisi de la covid-19, aprovat en julhet passat, compren un mecanisme que permet de suspendre las ajudas se s’ataca la libertat de premsa o se se manca a la separacion dels poders, mas los detalhs se’n precisèron pas e se devon debatre al Parlament Europèu. Ongria e Polonha avertiguèron alavetz que poirián metre lor vèto a l’acòrdi. Polonha planh que l’acòrdi siá un esplech per quichar lo país del temps qu’Ongria lo definís coma un “cantatge politic”.