Las autoritats del centre del país se son engatjadas per l’ensenhament de l’occitan. Las circonscripcions escolaras, dichas acadèmias, de Tolosa e Montpelhièr, d’un caire, e la region qu’a pres lo nom d’Occitània, d’autre caire, an signat de convencions per aquesta tòca, en partenariat amb l’Ofici Public de la Lenga Occitana (ÒPLO). Dins lo cas de la convencion establida amb l’acadèmia de Tolosa, an tanben signat los conselhs departamentals d’Avairon, de Nauta Garona, de Gers, dels Nauts Pirenèus, de Tarn e de Tarn e Garona, aital coma la vila de Tolosa, çò rapòrta Occitanie Tribune.
 
Atal, la region confirma son engatjament per l’occitan dins l’escòla publica après la convencion interacademica signada en genièr de 2017 amb la ministra de l’educacion d’alavetz e las acadèmias de Bordèu, Limòtges, Montpelhièr, Peitieus e Tolosa per la produccion de material pedagogic en occitan, la recuperacion de las doas oras d’occitan opcionalas en 5a, que foguèron reduchas a una per la reforma del collègi, una reparacion per recuperar de pòstes de professor d’occitan, las borsas “Ensenhar” pels estudiants que volguèsson devenir de professors e quitament velhar a de formacions en occitan dins las diferentas filièras universitàrias. Ara, las convencions particularas amb las acadèmias de Montpelhièr e de Tolosa, que venon d’èsser signadas, ne precisan las modalitats de començada.
 
“Soi particularament estacada a la diversitat culturala e lingüistica de nòstra region”, çò a dich sa presidenta, Carole Delga, en assegurant que son a menar “una politica volontària e ambiciosa en favor del desvolopament e de la valorizacion” de l’occitan e del catalan. Segon Delga, “l’aument del nombre de locutors passa per l’ensenhament d’aquelas lengas tre la mai jove edat e pendent tot lo cursus escolar”.
 
Segon Patric Roux, vicepresident de l’ÒPLO, “aquelas convencions son essencialas per assegurar la transmission de la lenga occitana dins las acadèmias de Tolosa e de Montpelhièr per las annadas avenidoiras. Engatjan los sòcis a conjugar lors esfòrces per i refortir durablament l’ensenhament de l’occitan en fixant d’objectius precises e dels mejans a atribuir. Concretament, garentisson la continuitat dels percorses, de la mairala al licèu, en inclusent una part dedicada a la formacion dels ensenhaires, e assolidan totas las filièras, sustot publicas e de Calandreta”.
 
 
Un objectiu de 26% d’escolans d’occitan en mai
 
La region ten l’objectiu d’aumentar de mai d’un 26% lo nombre d’escolans qu’aprengan l’occitan per mejan de la dobertura de nòus sits d’ensenhament dins lo primièr gra. A mai, se cèrca de bastir o de refortir los cursus complets al sen dels bacins educatius, per assegurar una continuitat de l’aprendissatge de la lenga, e tanben la mesa en plaça de mecanismes que faciliten lo dialòg entre las administracions.
 
La region tanben alestís una convencion per l’ensenhament del catalan en Catalonha Nòrd, en collaboracion amb l’Ofici Public de la Lenga Catalana.