En març de 2020, es a dire pendent lo confinhament, virèri en redond a l'entorn de la taula carrada del salon. Sabiái pas cossí tuar lo temps. Me demandèri, pas de temps en temps, mas sovent: cossí tuar lo temps?
Quina mena de temps tuar? Un temps aürós, neblós, nivolós, borrinós, nevós,...? Un temps que s’encabana, que s’apluèja, que se refresca, que s’esclargís, que s’escarrabilha...? I a lo temps que nèva e lo temps que desnèva. I a lo temps que gèla e lo temps que desgèla. I a lo temps de la tempèsta e lo del temps pichon? Aprèp un temps ne’n ven un autre.
Aprèp lo marrit temps vendrà lo bèl temps. Avèm pas besonh del maissant temps! Mas fasèm pas la pluèja ni lo bèl temps! Aprèp un temps ne’n ven un autre.
A temps a léser, quora lo temps o diguèt, volguèri remontar lo temps, remontar al temps vièlh, lo temps que Marta fialava. Perdeguèri mon temps a ensajar de tornar dire: “De mon temps...” Cal èsser de son temps!
Cossí tuar lo temps? De tot temps, tuar lo temps foguèt malaisit. Sabètz, corrís lo temps! Corrís talamai lèu qu’as pas lo temps de l’arrapar, de prene ton temps. De còps t’escapa, pèrdes ton temps. A temps perdut, as just lo temps de lo veire passar, es un passatemps.
Vau pas tuar lo temps, ai fach mon temps...
Prene lo temps!
Lo temps me pren!
(Escotar: Lo temps de las cerièras. J.B. CLEMENT.)
Clamenç
Umorista occitan
Partejatz lo confinament amb la rèsta de legeires
Encoratjam nòstres legeires a nos mandar de tèxtes, de vidèos, d’imatges o d’àudios sus lors idèas de passar lo confinament. De partejar aqueles moments entre totes nos ajudarà a nos donar d’idèas los unes als autres, e nos coneisserem un pauc melhor.
| fffff | fffff | fffff | ||
| Lo confinament dels legeires de Jornalet | ||||
 | Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor? | |||
| Manda tos documents a info@jornale... Convivéncia e paratge en confinament. | ||||
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Los psicològues radiodifusius e televisius quitan pas de dire que sèm totes deprimits. Quand qualqu'un vòl testimoniar que per el lo confinhaent se passa plan (sens negar qu'es quicòm de complicat, per pas dire dramatic, per fòrça mond) lo vòlon pas entendre.
Lo malaise ven pas tant del virus que de vidas vuèjas de sens.
De fach, lo virus es revelator del vuèg de fòrça vidas, de mond que sabon pas que far se se pòdon pas estordir per oblidar que sèm mortals e que de tot biais viure nos tua, mai o mens aviat. Es a dire que, mai que lo virus, lo problèma es s'èsser daissats transformar en consumaires, d'existir pas qu'atravèrs lo consumerisme. S'avisan pas que se consumisson en consomant. O mai plan o vòlon pas veire. E ara on pagan car.
Ara, cal reconéissr qu'es pas aisit de sortir d'aquela petega, per çò que tot es fach per que lo ramat ane dins lo meteis sens, lo que permet l'enriquiment astronomic de qualques uns, gràcias a la publicitat e als mèdias en general que mai que d'informaires son de propagandistas del neoliberalisme. Lo quite divertiment, fach per emplenar nòstres lésers, es vengut pagant. Demòra gaireben pas brica de léser que calga pas pagar per "tuar lo temps".
D'aquel temps... Lo temps semblèt looooong. E longtemps.
Per jorns, per mes, per ans ?
Vai e ven e vira lo temps del confinament.
Ara es ventadòs, es pietadòs
Pr'amor de luènh vesem
Lo printemps d'alara
Qu'èra lo del prim temps
Non se tua lo temps, s'emplega o se gasta. Per contra, çò segur es qu'es lo temps que nos tua.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari