Pel tresen còp, aprèp 2009 e 2014, los Dragons Catalans jogavan una mièja finala de la Superliga. E, pel tresen còp, capitèron pas de dobrir la pòrta del grand rendètz-vos final. Consequéncia de la partida contra Leeds: las sancions fòrtas de la comission de disciplina per Mac Illorum e Joel Tomkins. Los catalans dobriguèron la marca sus penalitat. Maloney prenguèt un jaune. Los angleses en profeitèron per marcar un ensag transformat. Los catalans ensajavan d’impausar lor poissença, mancavan d’escasenças de concretizar e… St Helens tornava marcar abans la pausa: 14-2.

Coma tròp sovent, la represa catalana foguèt catastrofica: tres ensages encaissats en dètz minutas. A 30-2, veniá impossible de cambavirar lo sòrt de la partida. Los Sants, sens pietat, marquèron tres ensages suplementaris: los darrièrs dos sus una intercepcion e sus un contra de 80 mètres. 48-2: la nòta es plan salada.
 
La finala serà un grand classic, divendres, a pòrtas barradas dins l’estadi d’Hull FC. Los Sants defendràn lor títol contra Wigan que ganhèt dijòus de ser aisidament 29-2 fàcia a Hull FC qu’auriá pogut jogar lo títol dins son estadi!
 
La cadena L’Équipe s’èra engatjada de retransmetre la finala se los catalans se qualificavan. Serà pas lo cas, mas la cadena e lo club discutisson per una difusion dels rescontres jogats a Brutus la sason venenta amb, per probabla consequéncia, las partidas programadas lo divendres de ser. Mas aquò demanda encara confirmacion.
 
 
Estats d’Origina: Queensland aviá la nhaca!
 
La partida decisiva dels Estats d’Origina se jogava dins un estadi comol d’espectators a Brisbane aqueste dimècres 18 de novembre. Los jogaires de Nòva Galas del Sud avián obtenguda l’autorizacion de las autoritats localas de venir a Brisbane per jogar e pas mai: un anar-jogar-partir, e zo!
 
Aprèp la dominacion dels Blaus la setmana passada, se balhava pas gaire car de la pèl dels Violets, mas la formacion locala trapèt una energia bèla dins los assordissents “Queensland! Queensland!” sens pausa del public e dins una volontat collectiva determinada.
 
Cinquena minuta: lo dobertura violet decidís de jogar a la man aprèp lo darrièr tengut. En cap de linha, Valentin Holmes marca e transforma son ensag. Los Blaus van tornar a nautor aprèp una patanada de l’arrièr violet a la recepcion d’una candela: Tedesco s’acontenta de pausar la man sus la palma que rebala pel sòl. Transformacion: 6-6. Mas gaire de temsp apuèi, Tedesco, capitani dels Blaus, assucat va daissar sos companhs. Los Violets dominan, campan dins los 20 mètres blaus, mas trapan pas la falha. La solucion se bastirà dins l’improvisacion amb una longa passa laterala al pè que permet al jove Eldrik Lee (alièr a costat de… son cosin) de marcar per sa primièra participacion a un Estats d’Origina. Holmes transforma: 12-6 a la pausa per Queensland.
 
Lo segond temps partís sul meteis ritme: una dominacion bèla dels Violets, una defensa impermeabla dels Blaus. Holmes passa una penalitat, lo jove talonaire Grant capita de pausar la palma just-justet sus la linha blanca: 20-8.
 
Los Blaus vòlon pas plegar: l’alièr Daniel Tupou marca, Nathan Cleary transforma e ajusta una penalitat: 20-14, la diferéncia d’un ensag transformat. Los Violets se trapan a 12 aprèp un carton jaune, mas blocaràn las darrièras velleïtats ofensivas dels Blaus per ganhar, a la suspresa dels especialistas e dels pronosticaires, la tièra 2020.
 
 
Elèit 1: una partida vodada a l’ataca a Limós
 
Quatre partidas èran al programa del campionat d’Elèit 1. A l’Agulha, Limós e Lesinhan avián rendètz-vos per un dèrbi que foguèt una celebracion del jòc ofensiu amb dotze ensages a la clau: 7 per Lesinhan e 5 per Limós, victòrias doncas de l’FCL: 40-12.
 
Vilanòva recebiá los provençals d’Avinhon dins una partida retransmesa per Via Occitanie. Los Leupards d’Aquitània s’impausan aisidament: 38-18.
 
Aqueste dimenge, Tolosa es mai en cambas que Palau: 36-18. Aqueste còp, Sent Gaudenç plega pas en fin de partida e bat Albi, traït per sos tustaires: 18-12.
 
Per la dimenjada qu’arriba, la mesa a jorn del calendièr trebolat d’una debuta de sason se perseguís amb los rescontres Vilanòva-Palau e Avinhon-Lesinhan.
 
 
 
 
Alan Roch