La crisi sanitària del coronavirus marca uèi los eveniments del Jorn Internacional per l’Eliminacion de la Violéncia contra las Femnas, que se ten cada 25 de novembre e qu’ongan serà mai present suls rets socials que per carrièras. Dins aquel sens, l’ÒNU prepausa dètz manièras d’agir quitament pendent una pandemia. A mai, an alestit una campanha apelada «Iranjatz lo Mond» e prepausa de messatges e de visuals per partejar suls rets socials, en divèrsas lengas e una version en blanc en cas que se vòlga crear en occitan.
 
 
Remembre dels sòrres Mirabal
 
Lo 25 de novembre foguèt declarat jorn internacional contra la violéncia de genre en julhet de 1981, dins l’encastre del primièr Rescontre Feminista de l’America Latina e de la Cariba, que se debanèt a Bogotà (Colómbia). Dins aquela amassada las femnas denoncièron la violéncia de genre dins lo domeni domestic e mai lo violament e lo secutament sexual dins lo domeni dels govèrns, en i inclusent la tortura e los abuses que las patissián fòrça presonièras politicas.
 
Se causiguèt aquel jorn per commemorar lo violent assassinat de las sòrres Mirabal (Patria, Minerva e Maria Teresa), tres activistas politicas assassinadas lo 25 de novembre de 1960 mentre qu’anavan a Puerto Plata per vesitar lors marits empresonats, entre las mans de la polícia secreta del dictator Rafael Trujillo en Republica Dominicana. Lors cadavres estroçats apareguèron al fons d’un vabre. Dedé Mirabal foguèt l’unica de las quatre sòrres que subrevisquèt, demorèt en Belgica e moriguèt en 2014 a l’edat d’88 ans. Ela fondèt l’ostal-musèu de las sòrres Mirabal.
 
Pel movement popular e feminista de la Republica Dominicana, istoricament, aquelas femnas simbolizan la lucha e la resisténcia. En 1999, l’ÒNU oficializèt lo 25 de novembre coma Jorn Internacional per l’Eliminacion de la Violéncia contra las Femnas.