La familha Moll de Narbona Plaja fan cada an per Calendas un presep subrebèl que quitament ganhèt los concorses de preseps de Jornalet de 2016 e 2017. Ongan, presentan una grépia adaptada a las circonstàncias actualas: es pas pus un vilatge mas un immòble, los personatges son confinats, lo restaurant es barrat, los santons pòrtan masca, etc.
 
Los preseps —tanben nomenats presepis, betlèms o grépias— son una de las tradicions occitanas del temps de Calendas, çò es lo temps de fèsta a l’entorn de Nadal e del solstici d’ivèrn. En Calendas, la cultura occitana se manifèsta plan, amb los repaisses en familha, de recèptas tradicionalas, los tretze dessèrts, lo cachafuòc o la soca de Nadal, las pastoralas, los nadalets, la decoracion de l’ostal...