Iran assegura que farà de represalhas après l’assassinat del scientific nuclear, Mohsen Fakhrizadeh, fusilhat divendres passat. Lo comandant general Ismail Qaani prometèt dissabte que las fòrças de seguretat iranianas venjarián lo crime que considèra coma una ataca terrorista e una “vergonha pels falses defensors dels dreches umans, de la democracia e de la libertat del Mond”.
 
Mohsen Fakhrizadeh èra vist coma lo paire del programa nuclear iranian. Foguèt assassinat divendres dins la vila d’Absard, a l’èst de Teheran, per un grop de terroristas. Après la fusilhada i aguèt tanben una explosion.
 
Lo pòrtavotz de l’ÒNU, Stéphane Dujarric, tanben a condemnat “l’execucion extrajudiciària” del scientific iranian malgrat que la majoritat dels govèrns de la planeta ajan pas res dich a prepaus d’aquel crime. Teheran condemna aquel silenci e exigís una volontat internacionala per que “los responsables d’aqueste acte terrorista rendan de comptes”. Fakhrizadeh es lo seisen scientific iranian assassinat d’un biais terrorista dempuèi 2010.